أعيش حياتى - الحلقة الآولى
جاري التحميل...
الحلقة الآولى
"هربوا من قيود الإيجار.. فوقعوا في فخ القدر!" الحكاية مش مجرد جيران ؛ دي رحلة بتبدأ بلقاء بريء بين (سلمى) و (فارس).. لقاء خلط بين لعبة "العروسة" وخوف "المسدس" هل السكن الجديد كان بداية الاستقرار.. ولا كان الستارة اللي خبت وراها كوابيس مكانتش في الحسبان؟
*ابدأ كتابة الحكاية بعيلتين راكبين عربية عيلة زهران مكونة من زوجة اسمها هدى وبنت صغيرة عندها ٦سنين اسمها سلمى ,,عيلة رأفت زوجة اسمها كاميليا وولد صغير اسمه فارس عنده ٦سنين ,, والعيلتين مستواهم المادى كويس ويكون كل واحد فيهم ايجار شقته خلص وقرره ياخده شقة تمليك وتوصل العربيتين ف نفس الوقت واحدة تقف ع رصيف اليمين والتانية ع الرصيف الشمال وينزلوا ويبصوا ع العمارة ويبدأوا ينزلوا الشنط ويطلعوا الدور تانى..*
سلمى*بطريقة طفولية*:الله يابابا كل ده بيتنا لوحدنا
زهران:اة ياحبيبتى وان شاء الله المرة دى مش هنسيبه ابدا وهيبقى بيتنا ع طول
هدى*ابتسمت*:يارب يبقى بيت فيه بركة وخير لينا ياااارب
زهران*ابتسملها*:ان شاء الله ياحبيبتى يلا بقى نغير هدومنا ونطلب حاجة ناكلها عقبال ماتبقى تنزلى تشترى الاكل الـ احنا محتاجينوا
*وبدأوا فعلا يغيروا وطلبوا بيتزا لان كانت دى اكلة سلمى المفضلة ..وف العمارة التانية عيلة رأفت دخلوا البيت*
فارس*بطريقة طفولية*:حلو اوى البيت ده انا هاخد اكبر اوضة عشان احط فيها لعبى
كاميليا:اكبر اوضة بتاعتى انا وبابا انت اوضتك التانية ومتقلقش كبيرة برده وهتعجبك
فارس*بفرحة*:ايوه هو ده
رأفت*ابتسم*:ان شاء الله هيبقى بيت كله خير وسعادة
كاميليا*ابتسمت*:ان شاء الله,يلا بقى نغير هدومنا عشان ابدأ اعملكوا الاكل
رأفت *بستغراب*:هو ف اكل ف التلاجة
كاميليا:لا طبعا *وبطلع الايس باج*:بس انا جايبة استربس وشوية صوصات وناكل بالعيش عقبال ما ابقى انزل اجيب حاجات لتلاجة
رأفت*ابتسم*:ديما بتبهرينى والله ياكاميليا
كاميليا:عشان تعرف ان مراتك ست بيت شاطرة وتصدق ده
رأفت:عارف والله ربنا يخليكى لينا
*ودخلوا يغيروا وياكلوا وبعديها بدأوا الستات ف توضيب الشقة وفرشها واحيانا كانت الرجالة بيساعدوا وكانوا الاطفال قاعديين بيتفرجوا ع كارتون عشان مش يشغلوهم ف التوضيب ويعدى اليوم ع الجميع وتانى يوم ينزلوا يشتروا طلبات البيت وطبعا اتقابلوا ف السوبر ماركت بس كاميليا وهدى ماكنوش عارفين بعض ووقت انهم منشغلين فأنهم يشتروا الحاجة فارس وسلمى يروحوا عند جزء فيه العاب اطفال وتمسك سلمى عروسة وفارس يمسك مسدس لعبة ويبصوا لبعض* فارس*بصوت طفولى*:حلوه العروسة دى
سلمى*بصتله ببرائه*:بس وحش المسدس ده
فارس*وهو بيقرب منها المسدس قصاد راسها كأنه هيموتها*:ليه كدا بس ده حلو
سلمى*بتحرك راسها بالنفى*:لا لانه مخيف بشوفهم ديما ف الافلام والمسلسلات بيقتلوا به وده مش حلو*وقالت بخوف*:ابعده عنى عشان بخاف منه
فارس*نزلوا م قصادها وفضل ماسكوا ف ايده*:ماهما بيموتوا به الاشرار ع فكرة مش اى حد
سلمى*بصتله وسكتت*
فارس:هو انتى اسمك ايه؟
سلمى*لسه هتتكلم*
هدى*تقرب منها*:كدا ياسلمى مش قولتلك خليكى جمبى وما تبعديش عنى
سلمى:ما انا جمبك اهوه ياماما انا بس عجبتنى العروسة دى وكنت بشوفها
هدى:انتى عندك عرايس كتير
سلمى*بحزن*: بس دى عجبانى وعيزاها
هدى*خدتها م ايديها ورجعتها مكانها*:معلش ياحبيبتى مش عاملة حسابى اوعدك بكرة هنيجى نجيبها
سلمى*الدموع ف عنيها*:بس هى عجبانى وممكن مش نلاقيها بكرة
هدى*بأنفعال بسيط*:خلاص بقى ياسلمى قولتلك هجبهالك وقت تانى *ومسكت ايديها وف الوقت ده جت كاميليا*
كاميليا:فارس واقف بتعمل ايه عندك
فارس:بتفرج ع الالعاب
كاميليا:طب يلا عشان نمشى
*وبصوا كاميليا وهدى لبعض وابتسموا ابتسامة صغيرة ومشيوا وجابوا حاجتهم وروحوا واول ماتوصل هدى البيت عندها تلاقى درية واقفة قصاد الباب*
هدى: ايه ده ماما! ماقولتيش ليه انك جاية
درية:حبيت اعملهالك مفجأه وكمان جيت قعدت اخبط ومحدش فتح ولسه هكلمك ف الموبايل لقيتك جيتى
هدى:نزلت اشترى حاجات البيت فاضى خالص
سلمى *بفرحة *:وحشتينى اوى يانينا
درية *حضنتها*: وانتى كمان ياعيون نينا *وبصيت لبنتها*:جرى ايه هنفضل نتكلم كتير ع السلم ولا ايه
هدى:لاطبعا ياماما اتفضلى
*وفتحت الباب و دخلت قاعدت مع مامتها*
درية*وهى بتبص ع الشقة بعنيها*:بس ماشاء الله البيت شكله حلو ربنا يكتبلكوا فيه الخير ويبعدكم عن شره يارب
هدى:يارب ياماما متتصوريش طلع عنينا قد ايه عشان نلاقيه ما انا حكيالك
درية: اة ما انا عارفة عشان تترحموا م حوار الايجار وعمايلوا الحمدلله ،بس قوليلى
هدى:ايه ياماما
درية:مش ناوية تفرحينى بقى وتجيبى اخ او اخت لسلمى
هدى*بصت لمامتها بضيق*:تانى ياماما تانى
درية:تانى وتالت وعاشر انا نفسى اعرف ايه الـ يمنع يعنى
هدى:مفيش حاجة بس احنا حاسيين ان كفاية سلمى عشان حتى نعرف نربيها كويس ونوفرلها كل احتياجاتها
درية:انا الـ اعرفوا انكوا كنتوا مأجلين لحد ماتستقروا واديكوا استقرتوا اهوه الحمدلله وبقى ليكوا بيت ملك جوزك ماشاء الله بقى متثبت ف شغله ايه المشكلة تانى بقى
هدى*بتنهيدة*:حاضر ياماما حاضر هبقى اتكلم مع زهران
درية:خدينى ع قد عقلى اوى يابت
هدى:ابدا ياماما والله ،بجد هتكلم معاه ف الموضوع ده اوعدك
درية:ماشى اما نشوف *وتعدى ساعات *:انا هقوم بقى اروح
هدى:ماتباتى معانا ياماما ايه الـ هيمشيكى وكمان زهران زمانوا جى ف الطريق
درية:لا انتى عارفة مابرتحش غير ف بيتى وع سريرى ابقوا تعالوا انتوا المرة الجاية بقى
هدى *ببتسامة *:حاضر ياماما
*ومشيت درية وف الوقت ده كان رأفت بيركن عربيته تحت البيت وشوية وموبايله رن*
رأفت:انا طالع اهوه ياكاميليا
كاميليا:ونبى يارأفت روح هات لبن عشان ابنك جننى وخلانى نسيت اجيبه
رافت*بضيق*:يعنى ايه ياكاميليا!! ده انا ما صدقت ركنت
كاميليا:معلش ونبى عشان اعملك البشاميل البتحبوا
رأفت:كدا بتغرينى يعنى *وقال بتنهيدة*:حاضر ياستى حاضر *وشغل العربية م تانى ولف عشان يخرج كان زهران داخل الشارع*:لوسمحت ارجع بضهرك عشان عايز اخرج م الشارع
زهران:انا داخل الشارع ارجع انت وبعد ما ادخل اخرج
رأفت*بضيق*:وفيها ايه لما تسبنى اعدى انا الاول وبعديها تدخل الشارع
زهران:عشان انا مستعجل
رأفت*بيعالى صوته*:انا مستعجل اكتر منك
زهران*بضيق وبيعلى صوته هو كمان*: ياعم ماشى سيبنى اعدى انا الاول بقى خلى اليوم ده يعدى ع خير
رأفت:ولو معدتش يعنى ايه الهيحصل وحياه ابوك انا لسه راجع م الشغل وجعان ومش شايف قدامى خلينى اعدى بقى اجيب الحاجة عشان اطلع
زهران:يعنى انا اللى راجع م دريم بارك ما انا كمان كنت ف شغل وجعان اكتر منك
رأفت*خرج راسه م شباك العربية*:جرى ايه انت بتعلى عليا ليه!! هو احنا عاملين مسابقة مين جعان اكتر
عزيز*رجل كبير ف السن ومعروف ف المنطقة*:استهدوا بالله يا اخونا الناس بدأت تتلم الموضوع بسيط وهيتحل ان شاء الله
زهران:انت مين حضرتك
عزيز:انا عمكوا عزيز يا ابنى جاركوا هنا ساكن ف نفس الشارع ،انا هعديكوا انتوا الاتنين
رافت:ازاى بقى
عزيز*فضل يرشدهم ويحركهم لحد ما وقفت العربيتين جمب بعض والاتنين باصوا لبعض نظرات نارية وكل واحد اتحرك ف المكان الرايحلوا*
زهران*طلع العمارة واول ما فتح الباب*
هدى*بلهفة*: ايه يازهران التأخير ده كله دى ماما كانت هنا وفضلت مستنياك بس انت اتأخرت اوى
زهران:بنى ادم همجى
هدى*بستغراب*:هو مين ده مديرك ف الشغل
زهران:لا ياستى واحد شكله جارنا*وفضل يحكلها الحصل *:انا ماشوفتش كدا ف حياتى
هدى:معلش ياحبيبى قوم دلوقتى غير هدومك عقبال ما احضر الغدا
زهران:هى سلمى فين
هدى :ف اوضتها
سلمى*خرجت تجرى ع باباها وحضنتوا*:بابا وحشتنى اتأخرت ليه
زهران: ف حاجة حصلت عطلتنى ،المهم بقى انك وحشتينى اكتر *وطلع م جيبوا كيكة هوهوز بالشوكليت الكانت بتحبها *:وجبتلك دى كمان
سلمى *فرحت اوى وباسته م خده *:هييييه ،بابا انا عايزة كمان اجيب العروسة العجبتنى
زهران*بص لهدى*:مجبتلهاش العروسة ليه
هدى:كنت عايزة اجيب الاساسيات الاول وكمان ياسيدى انا قولتلها هاخدها بكرة واجبهلها
زهران:بكرة ياحبيبتى هتجبيها
سلمى:ماشى
*ويقعدوا يتكلموا شوية وبعديها يتغدوا وف الوقت ده يوصل رأفت*
رأفت: خدى ياستى اللبن ياكش اكل النهاردة
كاميليا:ف ايه بس وكمان انت اتأخرت اوى كدا ليه ده انت لو بتجيب اللبن م الجاموسة نفسها كنت جيت اسرع م كدا
رأفت*بضيق*:قبلت واحد سد عليا الطريق داهية تسد نفسه
كاميليا:وبعدين ايه الحصل
رأفت*لسه هيحكيلها يخرج فارس ويحضنوا*
فارس:بابا وحشتنى
رأفت*بصلوا وابتسم *: وانت كمان يامغلبنى عامل ايه كنت شقى النهاردة
فارس:انا ابدا والله
كاميليا:اة خالص ولا جننى واحنا بنشترى الحاجة ولا حاجة ابدا برئ برائة الاطفال
رأفت: ماهو طفل فعلا بس شقى شوية وكمان ما تسبيه يعيش حياته
كاميليا:افضل دافع عنه اوى كل شوية
فارس:سمعتى بقى ياست ماما سبينى اعيش حياتى
كاميليا*بصتله ببتسامة*:حاضر هسيبك اما نشوف اخرتها ايه روح يلا اللعب عقبال ما اخلص الاكل *ومشى فارس*: كمل بقى ايه الحصل
*رأفت فضل يحكيلها وكان باين عليه الضيق اوى وف الوقت ده عيلة زهران بيتغدوا*
هدى:ماما كانت بتكلمنى النهاردة ف موضوع كدا
زهران*بستغراب*:موضوع ايه *وسكت شوية *:متقوليش الخلفة تانى
هدى:وفيها ايه بس مش نجيب حد يونس سلمى
زهران:هدى كل ما طنط تكلمك ف الموضوع بترجعى تفتحيه وبيحصل حوار مش لطيف احنا اتفقنا خلاص حياتنا هنكرثها لبنتنا وبس وكمان عشان نعرف نعيش حياتنا لكن هنضغط ع نفسنا كل حاجة هضيع مننا
هدى:يعنى عيل كمان هيضغطنا
زهران:اة انتى اصلا بقالك سنين عديتى مراحل العيال الصغيرة ويعتبر نستيها هتقدرى بقى دلوقتى تعديها تانى وترجعى تانى للسهر ومفيش تركيز وكمان هتلاقى سلمى هضيع ف كل ده لان غصبن عنك اهتمامك هيبقى ع البنت او الولد ال هييجوا وكل حاجة هترجع تتلغبط تانى بعد ما كنا مسستمين حياتنا*بصلها وقال بتنهيدة*:اعقلى ياحبيبتى وخلينا مكتفيين ببنتنا وبس
هدى:بــس*ولسه هتتكلم*
زهران*بغضب*:يوووه ولا بس ولا مبسش انا قايم م ع الاكل نفسى اتسدت *وساب الاكل وقام وسلمى طبعا كانت رغم انها طفلة لكن حسيت ان ف حاجة مش طبيعية وكانت فاهمة طشاش كدا بس طبعا ما قدرتش تدخل ف الحوار*
هدى*الدموع ف عنيها *:ماشى يازهران ماشى *وقررت انها متتكلمش معاه ف الموضوع ده تانى وتعدى فترة وتكون الامور مستقرة وف يوم تنزل هدى السوق عشان كانت حابة تجيب حاجات طازة وخدت معاها سلمى وكان اليوم ده الدنيا زحمة شوية*
هدى*بصيت لبنتها*:خليكى ماسكة ف ايدى جامد ولو سبتى ايدى فخليكى ماسكة ف الشال , فهمانى ياسلمى
سلمى*حركت راسها بنعم وفضلت فعلا ماسكة ف مامتها وشوية وحصلت حاجة..*
هدى*بعد ما اشتريت الخضار*:يلا ياسلمى هاتى ايديك *وبصيت جمبها وحواليها مالقتهاش اتخضيت ورمت الـ ف ايديها وفضلت تصوت وتصرخ وتنده عليها والناس كلها اتجمعت....وللحكاية بقية
هنعرف الحصل الحلقة الجاية ..
تأليف:فــاطــمــة هــشــام