الحلقة الحادى عشر - رواية أعيش حياتى
جاري التحميل...
الحلقة الحادى عشر
.........
*وتعدى فترة وكانت العيليتين بتستعد لرمضــان وكانت اجواءه مالية الشوارع والبيوت ويكونوا عايزين يعلقوا الزينة ومشغلين اغانى رمضان(رمضان كريم فتح ياعليم 30 يوم ف هنا وسعادة الله الله الله الله) وتسنيم وقاسم ييجوا عشان يشفوها ويكون وقتها زهران وتسنيم وسلمى واقفين ف بلكونة ,والبلكونة التانية رأفت وفارس وقاسم وكاميليا وهدى ف المطبخ بيجهزوا لفطار بكرة*
زهران*بصوت عالى شوية*:مش هينفع الزينة تعدى لازم نقطع الحبل الــ بينا ده
سلمى*بصدمة*:لا يابابا ونبى
رأفت*بيعالى صوته شوية*:الظاهر مفيش غير كدا
فارس*وهو بيخبى المقص وراه ضهره*:لا يابابا مش هينفع
رأفت:ياحبيبى عشان نعرف نكمل الزينة ف الجزء ده
زهران*بص لبنته*:ياحبيبتى عشان شكلها يبقى حلو ونكملها
سلمى*حركت راسها بالنفى*:لا يابابا مش عايزاك تقطع الحبل ده ،لا ونبى *وبدأت تعيط*
رأفت*بص ع عياط سلمى*:ف ايه!!
زهران*قرب منها*:طب خلاص ياحبيبتى اهدى
هدى وكاميليا*سمعوا صوتها وجريوا ع البلكونة*:ايه الحصل
سلمى*وهى بتعيط جامد وصوتها عالى اوى*
هدى:ف ايه يازهران
زهران:مش عايزانا نقطع الحبل
فارس*اضايق وبغضب*:مش عايز الحبل يتقطع انا *وبص لسلمى*:ماتعيطيش مش هنقطعوا
قاسم*بستغراب*:مالو الحبل ده مش فاهم
تسنيم*عمالة تطبطب عليها*:خلاص ياسلمى ماتعيطيش بقى
زهران*بص لرأفت*:خلاص يارأفت كفاية لحد هنا عشان مش هنعرف نكمل باقى الزينة نكملها ف البلكونات بقى
رأفت*حرك راسه بنعم*:ماشى خلاص *وحاول يهدى سلمى*ماتزعليش ياحبيبتى خلاص مش هنشيلوا
هدى*باصه ع بنتها وع قد ما عايزة تروحلها بس لاقيت زهران خدها ف حضنه وطبطب عليها وبدأت تهدى*
زهران:خلاص ياحبيب بابا هنسيبه ماتعيطيش
سلمى*حاولت تهدى وبصيت لباباها ومسحت دموعها وبعديها بصيت ع فارس وابتسمت وهو كمان ابتسملها وحرك بأيده الحبل واول ما سمعت صوت الجرس فرحت وابتسمت اوى*
*كملوا باقى الزينة ف البلكونات وكان فعلا شكلها حلو اوى وعلقوا فانوس كبير وهلال ونجمة بين البلكونتين وكان منظرهم جميل جدا وبعد ما خلصوا قاعدوا الاولاد مع بعض*
قاسم:انا مش فاهم مالوا الحبل ده
تسنيم:ده الـ فارس وسلمى بيكلموا بعض منه
قاسم*وهو بيهرش ف راسه*:ايه ده ازاى هو ينفع حد يتكلم بالحبل زى الموبايل كدا يعنى
تسنيم:لا طبعا ياذكى دى طريقة تانية
فارس*كان ساعتها باصص عليها*:متخافيش محدش هيقدر يقطع الحبل الـ بينا ده ابدا
سلمى*ابتسمت*:ايوه صح
تسنيم:بس الزينة شكلها حو اوى والفانوس جميل
قاسم:اة عليه كل الكارتونات اللى بنحبها بكار وفطوطة وبوجى وطمطم شكله جميل انا انبسطت اوى والله باليوم لو مش هنتجمع بكرة عند جده وتيتا كنا جينا هنا
سلمى:اة ياريت والله
تسنيم:للاسف مش هينفع عشان عيلتنا هتجمع مع بعضها
فارس:احنا هنتجمع كلنا بكرة ,اول ما هصحى بكرة هتعرفى م جرس الحبل
سلمى*ابتسمت*:ماشى
قاسم:ايـوه مالوا الحبـــــــــل ده بقـــــــــــا
تسنيم*بأسلوب طفولى*:ممكن تسكت شوية
*وفضلوا يتكلموا مع بعض ويهزروا وف الوقت ده تكون هدى وكاميليا بيتكلموا*
هدى:تفتكرى هيكفى
كاميليا:أن شاء الله وهيفيض المهم كلمتى طنط تقوليلها تيجى
هدى:اة طبعا كلمتها طبعا ف الاول اعترضت شوية وبعديها قولتلها اننا كدا كدا هنفطر هنا مش ف البيت عندى قعدت بقى تستفسر كتير وبعديها وافقت
كاميليا:انا كمان قولت لماما وبابا وفؤاد وهييجوا بكرة مبسوطة اوى انكوا هتتعرفوا عليهم
هدى:انا اللى متشوقة اعرفهم اوى
كاميليا:هانت كلها ساعات
*وف الوقت ده يكونوا رأفت وزهران قاعديين ع القهوه*
رأفت:م بكرة بقى خلاص نتقابل بعد الفطار ان شاء الله ونصلى التراويح ونطلع ننام عشان شغلنا
زهران:اة والله بس ربنا يعدى اول يوم ده ع خير عشان موضوع السجاير ده
رأفت:يــــــــاريت تبطلها والله يازهران عشان صحتك
زهران:بحاول والله انت عارف كل مرة ف رمضان عقبال ما يخلص اكون قليت منها شوية بس بعديها للاسف بالتدريج برجع اشربها عادى
رألإت:ربنا يبعدك عنها وتبطلها نهائى
زهران:يـــــــــــــــــارب
*وشوية وقرب منهم عزيز*
رأفت:هنستناك بكرة ياعم عزيز
عزيز:ان شاء الله مش هتأخر ورمضان كريم يارجالة
رأفت وزهران:الله اكــــــــــــــــرم
*ويقعدوا يتكلموا مع بعض وتانى يوم يكون يوم شغل عادى وكل واحد يروح لشغله فؤاد وقتها يكون ف المكتب وساعتها تكون يارا قاعدة بتكلم ف الموبايل*
يارا:وانتى طيبة وبخير ياحبيبتى ,ايوه طبعا اكيد هنتجمع ف يوم ,خلاص ماشى سلام
*وقفلت معاها ومارضيتش تبصله وكملت شغل*
ايمن*دخل المكتب واحد زميلهم م الشغل*:كل سنة وانتوا طيبين
يارا*ابتسمت*:وانت طيب ، اعرف ناس مابتقولهاش والله *وبصيت ع فؤاد*
ايمن:ليه يعنى ده حتى رمضان كريم شهر الخير كله
يار:اهوه نقول ايه بقى ,المهم انت محتاج حاجة
ايمن:اة محتاج اطبع ورق عشان الطباعة عندى معلقة مش عارفة مالها
يارا:ده عند الاستاذ*وشاورت ناحيته*:بس يارب يرد عليك بقى *وابتسمت وقعدت ع مكتبها*
فؤاد*اضايق م كلامها وخد م زميله الورق وطبعها م غير كلام وبعديها خرج وهو بصلها*:هو مش قديم جو التلقيح ده
يارا*بصتله*:انا بتكلم عادى يعنى
فؤاد:عادى يعنى!! وكمان انتى عايزة منى ايه
يارا*بصدمة*:هكون عايزة منك ايه يعنى ما تحاسب ع كلامك
فؤاد*بعصبية*:انا برده ما انا سايبك ف حالك خالص واحد غيرى كان قعد يلطف ويستظرف وانا مش كدا ومش بتاع الحوارات دى ومبحبهاش بس لو عايزة كدا تمام
يارا*بصوت عالى*:ماسمحلكش تتكلم معايا بالطريقة دى انت فاهم
رأفت*كان ساعتها داخل المكتب وسمع الكلام*:ايه ده ، ايه ده ،ف ايه ياجماعة اهدوا كدا
يارا*الدموع ف عنيها*:مستر رأفت انا عايزة امشى حالا
رأفت:ايه الحصل يا يارا
يارا*الدموع نزلت ع خدها*:مفيش بس محتاجة امشى انا اول يوم صيام وتعبانة
رأفت:ماشى اتفضلى
يارا*خدت شنطتها ومشيت*
رأفت*بص لفؤاد الكان متعصب وقعد ع المكتب*:ف ايه يافؤاد
فؤاد*بتنهيدة وبصله وسكت*
رأفت:عموما انا كنت جى اقولك انى هاخدك معايا وانا ماشى عشان كدا كدا هنفطر سوى النهاردة هستناك بعد الشغل *ومشى ورجعله تانى*:وهنتكلم واحنا مرواحين *وسابوا وخرج*
فؤاد*قعد ع مكتبه وكان مضايق م الحصل اوى وماكنش فاهم الـ بيعملوا ده صح ولا غلط*
*وف الوقت ده كانت عيلة كاميليا جم عندها البيت*
امينة:بسم الله ماشاء الله شقتك حلوه اوى ياحبيبتى
ابراهيم:ربنا يهنيكوا ويسعدكوا
كاميليا:يــــــــــارب ,نورتونى والله رغم ان كنت عايزاكم تيجو م بدرى
امينة:يابنتى انا فيا رُكب اروح ولا اجى ده ابوكى مخلص عليا م كتر الطلبات و الشاى
ابراهيم:لا ماتفتريش عليا انا واخدك عجوزة اصلا
امينة:ياسلام ومادام كدا اتجوزتنى ليه
ابراهيم:هو انا كنت هعرف الاقى ضفرك برده ده انا م غيرك مسواش حاجة
امينة:ياسلام اضحك عليا اوى
ابراهيم:حظك انى صايم كنت قولتلك عشان البؤيين الحلويين دول قومى اعمليلى شاى
امينة:ده الحمد لله احافظ ع رُكبى شوية
كاميليا*ابتسمت*:والله وحشتونى *واول ما قالت كدا الباب خبط*:تلاقيها هدى *واول ما فتحت الباب*
هدى:معلش اتأخرت عليكى
كاميليا:لا ابدا والله احنا كدا كدا امبارح مخلصين معظم الحاجات ،بابا وماما جم تعالى عشان تتعرفى عليهم
هدى*دخلت وسلمت عليهم*:ازى حضرتك ياطنط ,وحضرتك ياعمو
ابراهيم:اهلا يابنتى ازيك
امينة:مبتكلمنيش غير عليكوا انا مبسوطة والله ان جارتها واحدة ست كويسة زيك والله وتعتبر اختها التانية
هدى:شكرا ياطنط ويعلم ربنا انا فعلا بعتبرها زى اختى
ابراهيم:ربنا يديم بنكوا المحبة والمعروف يابنتى
*وفضلوا يتكلموا كلهم وف الوقت ده كانت درية ف البيت وبتجهز وموبايلها يرن وتكون بنتها التانية*
امال:الو ياماما ياحبيبتى عاملة ايه
درية:الحمد لله ياحبيبتى رمضان كريم
امال:الله اكرم ,كنتى بتعملى ايه
درية:بلبس عشان معزومة ع الفطار عند اختك او بمعنى اصح جيران اختك
امال*بضيق*:انا بصراحة ياماما مش عارفة ايه حوار الجيران ده ما كل واحد يبقى ف حاله وخلاص
درية:احنا مالنا بقى وكمان بصراحة هما ناس كويسة وكفاية موضوع سلمى ده مش بسيط يعنى
امال:ماشى ياماما بس مش مبرر موضوع الزيارات والعزومات ده
درية:ياختى كل واحد حر ,المهم انتى عاملة ايه وحشتينى انتى والعيال والله
امال: خلاص اجازة اخر السنة قربت ان شاء الله و انتوا هتبقوا تيجوا تغيروا جو ف الصيف
درية:ان شاء الله رغم انى مابحبش اسافر مع جوز اختك وانتى عارفة
امال*ضحكت*:أنتوا لسه ماتغيرتوش
درية:ولا هنتغير مادام هو دماغه ناشفة كدا
امال:معلش ياماما بقى اهم حاجة انه كويس مع هدى
درية*بتنهيدة*:ما ده المصبرنى والله
امال:ماشى ياحبيبتى انا قولت بس اطمن عليكى وسلميلى ع هدى انا كدا كدا بعد الفطار هبقى اكلمها شوية
درية:ماشى ياحبيبتى وسلميلى ع جوزك وبوسيلى العيال
امال:حاضر ياماما
*وتقفل مع بنتها وتكمل لبس عشان تنزل وتروح وف الوقت ده ف المدرسة*
فارس:انا عطشان اووووى
قاسم:وانا كمان رغم انى شربت ماية كتير لحد ما بطنى وجعتنى وبرده عطشان
سلمى:معلش خلاص الادان قرب
تسنيم:لا ده لسه ساعات كتير بس انا هحاول ما افكرش ف الماية ولا ف الاكل عشان ماجوعش واعطش زى ما ماما قالتلى
سلمى:ايوه صح
قاسم:هو انا ينفع اشرب بوء ماية واكمل صيام مش هيحصل حاجة دول شوية صغيرة معدتى مش هتحس بيهم
تسنيم:لا طبعا ما ينفعش وحاول تستحمل
سلمى*بصيت لفارس*:لما نروح هنقعد نلعب عشان منفكرش ف العطش
فارس*بتنهيدة*:ماشى
*وفضلوا يتكلموا وف الوقت ده يكون عمار واقف بعيد وبيشرب ماية*
رامز*قرب منه*:ايه ده انت فاطر رمضان ،يافاطر رمضان ياخسران دينك القطه السودا هتقطع مصارينك
عمار*بصله جامد*:ايـــاك تقول لحد
رامز:لا متخافش مش هقول
عمار:طب خد اشرب
رامز:لا لا انا صايم
عمار:براحتك *وفضل يشرب قصاده*:بس طعمها حلو وساقعة اوى
رامز*لاقه نفسه بصلوا وغصبن عنه ضعف*:طب هات اشرب بوء صغير
عمار*ابتسم بخباثة*:خــــــــد
*وفطر رامز وطبعا كانوا مقررين طول رمضان مايصموش وف الوقت ده يكون رأفت راكب العربية مع فؤاد*
رأفت:ممكن اعرف ايه الحصل ده والــ سمعته
فؤاد*بضيق*:دى واحدة غريبة انا معملتهاش حاجة هى مضايقة انى متجنبها معرفش ليه
رأفت:بص رغم ان انسة يارا بدأه تشتغل م قابليك بكام شهر بس محدش اتكلم عنها كلمة وحشة وباين عليها محترمة يمكن مضايقة م تجنبك ده لانكم زمايل ف مكان واحد فيعنى المفروض انكوا تتعاملوا مع بعض والتجنب ده مش احسن حاجة فعلا لانه الشغل بتاعكوا محتاج تعاون وتبقوا تيم واحد
فؤاد:بس انا مش حابب اتعامل مع حد بصراحة
رأفت:بصراحة يافؤاد متزعلش منى كلنا مستغربينك اوى انت مكنتش كدا ايام الجامعة وفجأه بعد ما خلصت كل حاجة اتغيرت وشخصيتك كمان بقيت هادى زيادة عن اللزوم *وافتكر زهران*:ده زهران بقى يتكلم عنك يا اخى
فؤاد*بتنهيدة*:ليه متقولش انى كبرت
رأفت*ابتسم*:ماشى ما ده الطبيعى انك تكبر بس شخصيتك تتغير ده يدل ان ف حاجة قوية حصلت وصلتك لكدا ايه هى بقى محدش عارف
فؤاد*بص م شباك العربية وسكت*
رأفت:عموما لو مش حابب تحكى براحتك بس نصيحة الشغل ياما هتشوف فيه ولازم تبقى مرن ف التعامل وياسيدى لو مش عايز تبقوا اصدقاء مش مشكلة بس اتعامل معاها حلو، ازيك ,عاملة ايه , هنعمل شغل ايه النهاردة افتح حوارات حتى لو بسيطة انت فهمنى
فؤاد:ماشى
*رأفت بصله ورجع بص قدامه وكان يتمنى ان الامور فعلا تهدى بينهم بعد اللى شافوا ده وراحوا كانت كاميليا ومامتها وباباها وهدى بس*
رأفت*اول ما دخل سلم ع حماه وحماته*:والله منورين
امينة:ده بنورك يا ابنى
ابراهيم:الواد فارس فين وحشنى عايز اشوفوا
رأفت:زمانه جى هو وسلمى
ابراهيم:سلمى مين؟
امينة:بنت هدى ,كاميليا بتكلمنى عنها وبتقولى الواد فارس بيحبها اوى
ابراهيم:طالع حبيب لجده
امينة:طبعا يا خويا اوى
ابراهيم:تنكرى ولا ايه
امينة:هو انا اقدر *وبصيت لابنها*:عامل ايه ف الشغل يا ابنى
فؤاد:الحمد لله ياماما كله تمام
*وفضلوا يتكلموا وشوية وجه زهران وكان معاه عزيز*
زهران:السلام عليكم
الكل:وعليكم السلام ورحمة الله وبركاته
عزيز*وهو جايب طبق حلويات*:كل سنة والجميع طيبين
رأفت:وانت طيب ياعم عزيز
*وبدأ يعرفوا ع حماه وحماته وقاعدوا كلهم مع بعض*
ابراهيم:والله اتشرفنا بمعرفتك يا استاذ عزيز
عزيز:الشرف ليا والله حضرتك
*وف الوقت ده كان فارس وسلمى طالعين وضربوا الجرس*
فارس*جرى ع ابراهيم*:جده حبيبى
ابراهيم:وحشتنى ياحبيب جدك
فارس:وانت كمان ياجده وحشتنى اوى
امينة:وانا موحشتكش
فارس*وهو بيحضنها*:وانتى كمان ياتيتا طبعا وحشتينى
فؤاد*ابتسم*:لا بس شكلك احسن م الاول خالص طبعا عشان سلمى جت
فارس*بصلها وابتسم*:اة
ابراهيم:هى دى سلمى ، ازيك ياحبيبتى
هدى*قربت منها*:روحى سلّمى عليهم ياحبيبتى
سلمى:ازيك ياجده وازيك ياتيتا
امينة:الحمد لله ياحبيبتى
ابراهيم:لا بس ذوقه حلو الواد ده
فؤاد:بس يابابا دول عيال
ابراهيم:ياخويا يعنى هيفضلوا عيال العمر كله
امينة:ربنا يبارك فى عمرهم
*وفضلوا يتكلموا وف الوقت ده تكون درية قربت توصل وكان واقف قصاد العمارة تاكسى وعمال ينزل حاجات وهى اضايقت وخرجت م التاكسى بتاعها عشان تتخانق مع الراجل اللى معطلها....وللحكاية بقية
هنعرف الحصل الحلقة الجاية
تأليف:فــاطــمــة هــشــام