رواية أعيش حياتى - الحلقة الرابعة عشر
جاري التحميل...
الحلقة الرابعة عشر
.........
*وتستمر الاجواء ف رمضان وتكون العيلتين بقوا يقربوا م بعض اكتر وقرايبهم يعرفوا بعض اكتر واكتر وف يوم تكون عيلة رأفت معزومة عند زهران وسلمى تكون بدور ع فارس مش تلاقيه تستغرب اوى وتدخل المطبخ تلاقيه كان بيقفل التلاجة*
سلمى:انت فين يافارس يلا عشان نكمل لعب
فارس*اتخض وييمسح بؤه*:يــــلا
سلمى*بصدمة*:ايه ده!! انت فطرت
فارس*بيحرك راسه بسرعة بالنفى ومسك زرار القميص وفضل يلفه*:لا لا انا مفطرتش
سلمى:بس ف علامة ع بؤك مطرح العصير , انت كنت بتشرب عصير!!
فارس*وبدأ يحرك ف الزرار جامد*:لا ده م امبارح
سلمى*بتضيق عنيها*:فارس انت بتكدب
فارس*بضيق*:لا انا مش كداب
سلمى:انت لما بتكدب بتقعد تعمل كدا فـ زرار القميص بتاعك حصل ده لما كنا ف الفصل لما كنت بتكدب ف موضوع المقلمة
فارس*نزل عنيه وراسة للارض وقال بحزن*:اة بكدب
سلمى:طب ليه فطرت يافارس
فارس*كان حاسس انه مضايق وساكت*
سلمى:ده تصرف مش صح ع فكرة
فارس:انا عارف بس انا لسه صغير وبابا ديما بيقولى اعيش حياتى
سلمى :بس الفطرانين الولاد الوحشين بس
كاميليا*ظهرت فجأه*:عندك حق ياسلمى
*سلمى وفارس بصولها*
كاميليا*بصيت لابنها*:عشان هو امبارح فضل ياكل ف قطايف وكنافة كتير وقت السحور وقولتله كدا غلط وهتعطش ومش هتقدر تكمل اليوم ماسمعش كلامى وم ساعتها ، لماصحى كان عمال يقولى عطشان وانا قولتله استنى شوية بس طبعا مقدش يستحمل وانا كنت عارفة انه هيعمل كدا
فارس*وهو خجلان م نفسه*:انا اسف مش هعمل كدا تانى والله اول واخر مرة
كاميليا*ابتسمت*:مفيش مشكلة انت لسه صغير وبتتعلم بس لازم تخلى بالك كويس وبعد كدا ماتستسلمش لاى احساس عندك احنا عشان كدا بنصوم ياولاد ع فكرة
سلمى: بنصوم عشان مانستسملش!!
كاميليا*ضحكت لانها مش عارفة تنطقها*:ايوه ياحبيبتى عشان نقاوم اى غلط او اى حاجة حرام يعنى احنا بنصوم وطول اليوم قدامنا الاكل والشرب ف احنا لازم نبقى اقويا ونقاوم ونقول لا مش هناكل ولا نشرب غير بعد الفطار زى ما ربنا قالنا وممكن نبقى زى الناس الضعيفة المتقدرش تمسك نفسها وتقولك لا مش قادر هاكل واشرب وخلاص بقى ,فأحنا لازم نبقى ايه؟
سلمى وفارس:اقوياء
كاميليا:ونبعد عن ايه؟
فارس :اى حاجة غلط
سلمى:اى حاجة وحشة
كاميليا: برافوا عليكوا* وبصيت لابنها*:سماح المرة دى ياحبيبى وياريت بقى تبقى دى اخر مرة وكمان تحاول ماتكلش ولا تشرب حاجة تانى لحد المغرب
فارس: حاضر ياماما *وبص لسلمى*:يلا نلعب
سلمى*ابتسمت*:يلا
*وبعد ما خلصوا وخرجوا م المطبخ هدى جت*
هدى:ايه الحصل
كاميليا*ابتسمت*:شقاوه عيال
*وفضلوا يتكلموا مع بعض وف الوقت ده زهران ورأفت قاعديين مع بعض*
زهران:الشغل بيكتر عليا اوى حاسس انى ف يوم م الايام هسيبه
رأفت:ليه بس كدا
زهران :مضغوط اوى وعارف لما يلاقوا بقى حد شاطر باخد كل الشغل فوق دماغى
رأفت:لا ما حرام يعنى والباقى فين وكمان تعالا هنا هو انت لو سبته هتشتغل ايه؟
زهران: مش عارف ماهو ده العمال افكر فيه
رأفت :لا مش هتسيبه ولا حاجة انت بس اعمل الـ عليك وخلاص
زهران:بحاول والله المهم وانت
رأفت: لا انا الحمد لله كويس جداا وحتى فؤاد بدا يفهم الشغل
زهران: ده اخوه مراتك
رأفت:اة شغلته معايا ما انا قايلك قبل كدا
زهران :ايوه افتكرت انت عارف صيام بقى
رأفت*ابتسم ولسه هيتكلم موبايله رن*:ايوه يا بابا عامل ايه ياحبيبى
فهيم:الحمدلله
رأفت:مش ناوى تيجى ماجتليش غير اول رمضان و قرب يخلص وماجتش تانى
فهيم *ابتسم*:قريب ان شاء الله
زهران*بيعالى صوته شوية*:عمو العزومة المرة دى عندى ع فكرة الاسبوع الجى ان شاء الله
رأفت*فتح الاسبيكر*
فهيم: ياحبيبى تسلم والله وديما عامر بحسكوا
زهران :خلاص هنستناك ماشى
فهيم: اهم حاجة حماتك ماتكُنش موجودة
زهران:اهي دى موعدكش هدى اكيد هتقولها بس ممكن لو عرفت انك جى ماتجيش
فهيم*بضيق*:يعنى انا العايز اشوفها اوى ست غريبة يلا مش عايز اضيع صيامى والله
رأفت: خلاص بقى يابابا الفات مات هنستناك ان شا الله
فهيم: ان شاء الله ياحبايبى اشوف وشكوا بخير
رأفت* قفل مع ابوه*:ابويا مش طايقها خالص
زهران:عنده حق ده انا بقالى سنين بحاول والله
رأفت:لا بس انت ممكن تسكت وتعدى انما انا ابويا مستحيل
زهران*ابتسم*:عارف احلى حاجة ف الموضوع ده ايه؟
رأفت :انها هتحل عنك طبعا
زهران* ضحك*: بصراحة اة
رأفت:وتمسك ف ابويا يعنى
زهران :ياعم انت ابوك يقدر يتكلم عادى لكن انا مش هقدر وكمان متخافش هنحاول نخلى الامن مستتب ويمكن فعلا ماتجيش
رأفت*بتنهيدة*:اما نشوف الهيحصل
*وفضلوا يتكلموا ويعديها ييجى ميعاد الفطار ويفطروا ويعدى اليوم وتانى يوم يكون فؤاد ف المكتب ويارا تكون متأخرة رغم انه يحاول مايهتمش بس يكون مستغرب ديما كان بيلاقيها وحاول مايركزش كتير وتعدى ساعات وبرده ماتجيش وشوية ويروح لرأفت المكتب*
رأفت: ايه يافؤاد ف حاجة ولا ايه
فؤاد :لا بس المعايا ف المكتب ماجتش
رأفت:اة اتصلت تاخد اجازة بتقول تعبانة شوية
فؤاد*بستغراب*:مالها
رأفت *بصله*:مش عارف بصراحة ماسألتش بس قولتلها الف سلامة
فؤاد* بصله وسكت*
رأفت:هى دى حاجة تقلقك؟
فؤاد: لا خالص بس يعنى ف حاجات ف الشغل لسه بعرفها
رأفت: لو حاجة وقفت معاك قولى
فؤاد :ماشى *وفضل واقف وسرحان*
رأفت: يلا يا ابنى ع مكتبك
*فؤاد اتحرك ع المكتب وكان مستغرب ليه شغله الموضوع ماكنش عايز ده يحصل وكان فعلا م جواه بيفكر ان ده ولا حاجة! بس كان شايف انها لما تكون موجودة بيفهم منها حاجات كتير حتى لو بيعاملها مش احسن حاجة ,وف الوقت ده كاميليا تكون بتكلم هدى ف الموب*
هدى: هاتى نمرة طنط اعزمها ع الفطار
كاميليا: لا انسى ماما وبابا مستحيل ييجوا تانى دلوقتى خالص
هدى:ليه بــــــس
كاميليا:يابنتى هما كدا, فين وفين لما ينزلوا حكم السن بقى
هدى:انا بجد كنت عايزاهم موجودين اليوم ده
كاميليا: بصى انا هكلمها واقولها يس صدقينى انا عارفة عيلتى كويس وياستى لو معرفوش ييجوا تتعوض ف العيد ان شاء الله
هدى:خلاص ماشى* ولقيت ان مامتها بترن*:طب انا هقفل عشان ماما بتكلمنى
كاميليا: ماشى ياحبيبتى سلميلى عليها
هدى:ماشى يوصل *وقفلت وردت ع مامتها *:الو ياماما كنت لسه هكلمك
درية:خيـــــــر
هدى: عزماكى ع الفطارالاسبوع الجى ان شاء الله
درية :لالالالالالا تانى ده لاممكن ابدا
هدى :ليه بس ياماما
درية:اجى بيت جوزك المش طايقنى ده
هدى:ابدا ياماما خالص، ده اليوم ده كان بيهزر هو عارف انك موجودة وحب ينكشك مش اكتر
درية: يابت متكدبيش عليا
هدى*سكتت شوية*:يعنى ايه ياماما مش هشوفك ابدا يعنى بعد كدا وكمان ده عازم عيلة رأفت كلها
درية:كلها ازاى يعنى مراته وابنه بس
هدى: لا وابوه
درية*بضيق*: لا يابنت بطنى لا ,ده انتى عايزة تقهرينى بقى
هدى :ليه بتقولى كدا بس ياماما
درية :اجى واشوف الراجل ده تانى لا ياهدى لا
هدى :ياماما ده عمو كويس والله هو بس كان موقف بايخ ومر لحاله
درية:ومش اى موقف والله
هدى *بتنهيدة*:عموما ياماما انا قولتلك وهعمل حسابك وهستناكى
درية :لا يابنتى لا ،انا اجى تانى و اشوفه لا يعنى لا
*وفضلت درية تلالاء بس طبعا م جواها كانت حاسة انها عايزة تيجى وف الوقت ده فارس وسلمى قاعدين مع بعض بيلعبوا عقبال ماتسنيم وقاسم ييجوا*
تقى* قربت منهم وقالت بصوت طفولى ودلع*:ممكن ألعب معاكوا
فارس *بصلها وبص لسلمى وسكت*
سلمى *بضيق*:مش هينفع
تقى: ليه بس والله أللعب معاكوا لعبة واحدة وخلاص
سلمى*قامت ربعيت ايديها وقالت بضيق*:احنا اصلا مش بنلعب
تقى:اومال تعملوا ايه
سلمى :ملكيش دعوه
فارس* قام وقف ف النص مابينهم*
تقى* بحزن ودموع ف عنيها*:انا بس كنت عايزة نألعب سوى
سلمى*بغضب*:يوووووووه قولتلك لا
فارس: خلاص ياسلمى بقى اهدى
سلمى*بصتله*:هو انت عايز تلعب معاها ولا معايا
فارس *بصلها وسكت*
سلمى* بصدمة*: فارس رد
فارس: اكيد معاكى ياسلمى *وبص لتقى*انا مش هلعب غير مع سلمى وبس
تقى* الدموع نزلت م عنيها ووقتها جه قاسم وتسنيم*
تسنيم: ف ايه
قاسم*بفرحة*:هى تقى هتلعب معانا ولا ايه
تسنيم* بصت لسلمى*: مظنش
فارس *بص لتقى ولسه هيتكلم وقعت اغمى عليها ف حضنه*
سلمى *شافت كدا اضايقت اوى وماكنش فارق معاها غير انه ماسكها وهى كدا وطبعا كل زمايلهم اتخضوا وجه مدرسين شالوها ودوها لدكتور ف عيادة المدرسة*
فارس: صعبت عليا اوى
سلمى*بغيظ*:والله
قاسم :ياترى تعبانة مالها
تسنيم :انا اتخضيت وانا شيفاها بتقع كدا ع فارس
سلمى: انت ازاى تسيبها تعمل كدا
فارس* ببرائه *:انا مش لحقت اعمل حاجة فجأه وقعت عليا
سلمى*بضيق*:كنت مفروض تزقها وتبعدها عنك
تسنيم :كانت كدا هتقع ع الارض
سلمى*بخنقة* :انا بكرهها البنت دى
قاسم: ليه بس ياسلمى ده حتى شكلها حلو
سلمى*بصتله وسكتت وفارس ماكنش عارف ليه بتكرهها كدا حتى هى كمان ماكنتش فاهمة احساسها ده ايه او يمكن كانت لسه صغيرة عن انها تستوعب انها بتغيير عليه وشوية وتخرج م العيادة*
المُدرسة:اطلعى هاتى شنطتك ياتقى عشان تروحى *وبصتلهم*:زميلتكوا تعبانة شوية ياولاد هتروح دلوقتى وبكرة هتبقى كويسة ان شاء الله
سلمى *ماكنتش مهتمية بكل ده وكل الهممها انها تبعد عنهم وعن فارس وتعـدى ايام وييجى يوم العزومة ويكون رأفت متوتر م مقابلة ابوه بـ درية بس تطمنوا كاميليا وتقولوا انها رفضت تيجى زهران طبعا حب يعزم عزيز كمان عشان هو كان عايز يعزمه م البداية*
هدى: طنط وعمو وفؤاد مش هييجوا برده
كاميليا: زى ما قولتلك مش هيرضوا وفؤاد كمان اليومين دول شايل الشغل عشان المعاه مش موجودة فمش هيقدر ييجى
هدى: تتعوض مرة تانية ان شاء الله
كاميليا:ان شاء الله
*وشوية والباب خبط وزهران يروح يفتح ويطلع فهيم وشايل قفص منجا*
فهيم:ازيك يا زهران يا ابنى
زهران*ابتسم*:الحمد لله ياعمو *وشاله منه *:تعبت نفسك والله
فهيم: ولا تعب ولا حاجة دى حاجة بسيطة يعنى
زهران :اتفضل ادخل ياعمو
*ودخل وسلم ع الجميع وكان بيبص بعنيه عشان يتأكد انها ماجتش*
سلمى: هى نينا مش جاية ياماما
هدى:لا ياحبيتى قالت مش هتقدر تيجى
فارس*م غير ما هدى تاخد بالها*: كويس كويس
سلمى: ليه بتقول كدا
فارس :عشان المرة الفاتت اتخنقت هى وجده لو جت هيتخانقوا تانى
*وفضلوا يتكلموا مع بعض وبدأت كاميليا وهدى يجهزوا الفطار وشوية الباب خبط وراح زهران يفتح ......وللحكاية بقية*
هنعرف الحصل الحلقة الجاية
تأليف:فــاطــمــة هــشــــام