لو رجع بيا الزمان | الجزء السابع
جاري التحميل...
الجزء السابع
.........
*هالة تستغرب ان سليمان اتأخر وتقول تستنى شوية عشان كانت مترددة تتصل عليه واخر ما يأست كانت هتتصل ومسكت موبايلها ولسه هترن تسمع صوت وتبص وراها تلاقيه نادر اخو صاحبتها ولاء*
هالة:ايه ده نادر!! انت جى مع ولاء ولا جى عايز ولاء ؟
نادر:الاتنين! جيت معاها وفجأه تاهت منى ف الحفلة الموسيقية ال احنا فيها دى ومش لاقيها
هالة*ابتسمت*:طب تعالا اقعد معايا هنا وهتصلك عليها تجيلنا اسهل
نادر *دخل معاها وشاف الاوضة وشاف اللألات الموسيقية كتير بس قرر يقعد ع البيانو ويعزف اى حاجة وكان ازعاج اوى*
هالة *بتحط ايديها ع ودنها*:بس ياابنى بس ,ايه الصداع ده *وقعدت جمبه وفضلت تعزف*
نادر*اول ماخلصت قال بهزار*: ده نفس ال كنت بعمله ع فكرة
هالة*ضحكت*:بزمتك
سليمان*كان واقف وفضل يصقف*:برافو
*هالة ونادر اتخضوا وبصولوا*
نادر*بستغراب وبيشاور بأيديه*:مين ده
هالة:ده زميلى وبندرب سوى هنا
سليمان*بغيظ*:طب وانا مش هتعرفينى ع ال جه خد مكانى
هالة*استغربت م القالوا وفهمت ان قاصده قاعد جمبها بدالوا*:ده نادر اخو ولاء صاحبتى وجى زيارة
سليمان:زيارة ليه هو احنا ف معرض ازياء ولا ايه
هالة*بصتله وبرقيت*: ف ايه ياسليمان
نادر:هى الكلية مكتوبة بأسمك ولا حاجة
سليمان: ده دمه خفيف كمان
هالة:سليمان *وسكتت شوية*:انا جيت ملقتكش كنت فين
سليمان:د. حبيب مجمعنا ف المسرح وحاولت اكلمك موبايلك مقفول قولت اجى اشوفك لو وصلتى اجى اخدك و نروح سوى بس الظاهر انى اتأخرت، عن اذنكم
نادر *بستغراب*:مالو ده
هالة *بتنهيدة*:مفيش,يبقى كدا ولاء ف المسرح تعالا ننزلها *ونزلوا سوى واول ماوصلوا ولاء قربت منهم*
ولاء:انت فين يانادر
نادر :توهت ياستى وقابلت هالة وقاعدنا سوى وبعديها جه سى بتاع ده عمل حوار
ولاء:قصده ع سليمان
هالة*بتحرك راسها بنعم*
نادر:هو مين ده اصلا
ولاء :واحد زميلنا عادى يعنى وهو بس شخصيته كدا متركزش، متركزش
نادر :ماشى انا كدا كدا زهقت وهمشى
سليمان *عدى م جمبهم وبص لنادر نظرة نارية*
نادر :تصدقى عندا فيه مش ماشى وادى قاعدة *وقعد ع كرسى وولاء وهالة جمبه وكان سليمان كل شوية يبص ناحيتهم بضيق*
هالة*كانت شايفة كدا وفاهمة ليه بيعمل ده*
د.حبيب:يلا بقى ورونى وصلتوا لفين *وبدأ تيم تيم يطلع وجه الدور ع سليمان وهالة ومفروض هيبدأ يعزف الاول وبعديها يغنى وهالة تبقى واققة قصاده وبصالوا ولمسة البيانو بأيديها وتدخل هى كمان ف الاغنية ورغم الاجواء متوترة حاولت هالة تهدى وتركز وفجأه سليمان لغبط ف العزف هى بصتله وهو بصلها*
سليمان*ببرود*:اسف
هالة*بصتله وسكتت*
سليمان*برده اتلغبط*:اسف تانى
هالة*بصتله وطبعا كل ده قصاد د.حبيب وزمايلهم وكان كل شوية سليمان يلغبط العزف وحتى لو كملوا يسكت ميغنيش الكوبليه بتاعه وبدأت هالة تتوتر جدا م البيحصل ده*
د حبيب:واضح انكوا محتاجين تدربوا اكتر م كدا ف وقت اضافى لازم تقعدوه سوى
هالة*بصيت بضيق لسليمان وقربت منه*:انت بتعمل ايه؟
سليمان*ببرود*:مبعملش حاجة
هالة:انت فعلا مابتعملش حاجة م اللى دربنا عليها هو ده تصرف طبيعى يعنى انت قولتلى احنا احسن م اى حد هنا فجأه بقينا احنا اقل ناس هنا!
سليمان:معلش مش عارف اركز شوية وانتى كمان شكلك مش هتعرفى تركزى *وبص ع نادر*
هالة:انت ع فكرة مش طبيعى
سليمان *بعصبية*: قصدك ايه؟ اتمنى يبقى ف حدود ف الكلام بينا اكتر م كدا, انتى فاهمة
*الدكتور والشباب بدأوا يحسه ان ف حاجة وهالة خرجت بسرعة م المسرح والدموع ع خدها وروحت وكانت مضايقة اوى خصوصا ان عصبيته دى فكرتها بالحلم الحلمته لى ودخلت ع اوضتها وكانت قاعدة ع سريرها وبتبص ع ايديها وشوية وموبايلها رن وقالت لو هو مش هترد عليه بس طلعت ولاء*
ولاء :ايه يابنتى العملتيه ده
هالة :انا برده مشوفتيش العاملوا بوظ كل الـ احنا دربناه وكمان ماشوفتيش الاسلوب الكلمنى به
ولاء:عايزة اقولك الدكتور حس وقعد مع سليمان وشكله كدا هيشيلكوا م التدريب مع بعض
هالة:احسن, عشان خلى عصبيته دى تنفعوا تخيلى بيغير عليا م نادر
ولاء *بتضحك*:بتهزرى, انتى تحكيلى بقى
هالة *فضلت تحكلها الحصل*
ولاء :طب ما عنده حق يابنتى وكمان هو ميعرفش ان نادر اخويا الصغير لانه ماشاء الله باين عليه شاحط كبير واكبر منى شخصيا ف حس ممكن يكون بينكوا حاجة خصوصا انك عمالة تصديه! وفجأه لاقاكى قاعدة معاه بتعزفى وبتضحكى وتهزرى فلازم يعمل كدا
هالة:مش مبرر ع فكرة
ولاء:انا عارفة بس عموما لازم تيجى بكرة لان الدكتور عايز يتكلم معاكى
هالة: اووف بجد عاملى حوار م لاحوار
ولاء:ولا حوار ولا حاجة ولو مش مرتاحة قوليلوا وهو بيتكلم معاكى
هالة: انا فعلا هقولوا يخلينى مع حد تانى احسن
ولاء:رغم المسافات مش هتقلل الحب الـ ف قلبكوا لبعض يعنى
هالة:ولاء بقى
ولاء" ابتسمت*:خلاص خلاص انا هقفل بقى واشوفك بكرة ,سلام
هالة* قفلت وفضلت تفكر هتعمل ايه لحد بكرة ووصلت الكلية فعلا وقبل ما تروح لدكتور قررت تطلع الاوضة اخر مرة واول ماوصلت لقيت سليمان قاعد ع البيانو وبرده بيعزف نغمة خليك معايا وشوية وحس بيها وكانت لسه هتمشى قام بسرعة وقرب منها ووقف قصادها*
سليمان:انا حقيقى اسف
هالة*بصتله والدموع ف عنيها*:هتفضل لحد امتى تجرحنى وتقولى اسف، توجعنى وتقولى اسف وبصيت ع ايديها ماكنش فيها حاجة وقالت بحزن: تعورنى وتقولى اسف
سليمان*بستغراب*: انا عملت كل ده
هالة *بصتله والدموع نزلت م عنيها *
سليمان *اول ماشاف كدا قرب ايده منها وكان هيمسحها وبعديها بعد ايده بسرعة*:انا ماكنتش عارف انى عامل فيكى كل ده عموما ده مش هيتكرر تانى انا بس اضايقت لما لقيتك قاعدة مع واحد ف المكان ال انا مسميه مخبأنا وخاص بينا انا وانتى *وقال بأنفعال*: معرفش ليه حسيت بكدا بس ده الحصل وده الحسيته
هالة* مسحت دموعها وبصتله*: نادر يبقى اخو صاحبتى وعرفاه م وهو صغير وع فكرة قد اخويا ف ثانوى ويبقى زى اخويا بالظبط
سليمان*بص ف الارض وماكنش عارف يقول ايه وبعد كدا بصلها تانى*:واضح انى لبخت الدنيا
هالة*لسه هتتكلم*
د.حبيب*جه وقرب ناحيتهم*: كويس انكوا مع بعض عشان عايزكزا انتوا الاتنين
*بصولوا بأهتمام*
د حبيب: انا لما اختارتكوا سوى عشان شوفت فيكوا حاجة حلوه اوى مع بعض وتقدروا تطلعوا ده ع المسرح بس الظاهر انى غلطت وجهة نظرى غلطت المرة دى انا ممكن اوزعكم ف فرق تاتية
هالة*بصت لسليمان الكان بيترجاها بعنيه وبصيت للدكتور*:لا يادكتور احنا هنفضل تيم واوعدك ان ده مش هيتكرر تانى
د.حبيب*بصلهم وابتسم*:عموما ده كويس لان الحفلة كمان اسبوعين وكان صعب تتوزعوا بس كنت اقدر اعملها عادى برده المهم دلوقتى عيزكوا تتمرنه كويس وتورولى حاجة خيال مفهوم
هالة وسليمان:حاضر *وبصوا لبعض وبعد ما الدكتور مشى قاعدوا يدربوا وكانوا شوية يغنوا وشوية يعزفوا وكانت كل يوم بتقرب منه عن اليوم القابله وبدأت تحس ان ف حاجة جواها بتتبنى لى فعلا وماكنتش عارفة تسيطر ع مشاعرها دى كأنه قدرها انها تقابله وتحبه وتعدى ايــام وييجى ميعاد الحفلة وتيجى مامتها واخوها وولاء تيجى مامتها واخوها برده وكانت اليوم ده هالة متوترة اوى*
سليمان:مالك اهدى
هالة*بتبص م وراه الكواليس*:خايفة اووى بجد شايف عدد الناس وكمان بابا شكله مجاش
سليمان:متقلقيش بالنسبة لباباكى ممكن يكون ف الطريق اما بقى بلنسبة لتدربنا * وقرب منها ومسك ايديها*:متخافيش انا معاكى
هالة*فضلت باصة لنظرته وبعد كدا بصيت لأيده وبعدتها وسكتت*
سليمان*ابتسملها*
ولاء*قربت منهم*:انا متشوقة اسمع عزفكوا والاغنية اوى
هالة*ابتسمت*:خلاص هانت وربنا يسترها
ولاء:يارب عشان انا كمان قلقانة اوى
سليمان*بهزار*:ده انتوا اصحاب جداا
د.حبيب*جه وجمعهم*:جاهزيين ياشباب انا عايزكم تبهروهم وكمان م ضمنيهم اهليكم يعنى لازم تشرفوهم كدا
*الكل ابتسم وكانوا بيدعوا ان اليوم يعدى ع خير وبدأوا يمشوا*
د.حبيب*بص لسليمان وقرب منه*:محدش لسه جه م اهلك
سليمان:جايين ف الطريق اختى وخطيبها
د.حبيب:تمام وعالى صوته شوية *:استعدوا ياشباب يلا
*وفعلا بدأت الحفلة وكانت كل فرقة تدخل تغنى وتعزف،، وجه الدور ع هالة وسليمان وفضل يعزف وهالة واقفة قدامه وحاطة ايديها ع البيانو بعد كدا قعدت جمبه*
سليمان:حاجه غريبه حاجه غريبه ،الدنيا ليها طعم جديد
،حاجه غريبه حاجه غريبه،انا حاسس ان دا يوم عيد
هالة: وانا حاسه الدنيا هربانه، ويانا ف ليل كله سعاده
ليها فرحه حلوه ف عينيا وحلاوتها سكرها زياده
انت عارف ليه؟
سليمان*بصلها ومسك ايديها*:قولى انتى ليه!
هالة*رغم انها اتوترت لما عمل كدا وبصتله وحاولت تهدى وتكمل*:علشان احنا مع بعضينا و لأول مره لوحدينا و محدش بيبص علينا غير فرحة قلبنا و عنينا *وبعد ما هالة قالت الكوبليه بتاعها بعدت ايديها عنه بهدوء وبصيت قصادها كان باباها جه وقعد ،ابتسمت وفضلوا يكملوا وبعد ما خلصوا الكل فضل يصقفلوهم وبعد الحفلة كل واحد كان واقف مع عيلته*
نيفين:حلو اوى ياحبيبتى بجد اتبسطت بالأغنية
هشام:لا صوتك طلع حلو بجد
هالة*بهزار*:انت كان عندك شك ف كدا ولا ايه
هشام:لا عارف بس اتأكدت
صدقى*بيحضنها*:ربنا يسعدك ياحبيبتى ومايحرمناش منك ابدا
هالة:ويخليك لينا يابابا *وابتسمت وفضلت تتكلم معاهم وولاء كانت مع اهلها*
نادر:كانت حلوه الحفلة اديها ٩ونص م عشرة
ولاء:شكرا ع تقييمك يا استاذ نادر وياترى النص التانى راح فين
نادر*بهزار*:عشان مغنتش معاكم
هناء*بصيت لابنها*:كدا كانت هتبقى ١م عشرة ياعين امك
*وفضلوا يهزروا ويتكلموا سوى وسليمان كان واقف مع اخته وخطيبها*
سليمان:انا مبسوط انك جيت ياموهاب والله قولى ايه رأيك بقى
موهاب*ابتسم*:انا حقيقى استمتعت
غادة:ربنا يخليك ياحبيبى ويحفظلك صوتك الجميل ده
سليمان*ابتسم لاخته*:وبالنسبة للعزف
غادة:لا بجد كان تحفة انبهرت به جدا
سليمان*بهزار*:عشان تعرفى ان اخوكى مش اى حد عمر خيرت عايش معاكى* اول ما قال كدا صدقى قرب منه*
صدقى:قولت اجى اسلم عليك بنفسى صوتك كان حلو اوى وعزفك جميل
سليمان*بتوتر وبص لهالة وبعد كدا بصله*:شكرا جدا ياعمو
صدقى:هو مامتك وباباك فين عايز اسلم عليهم
سليمان:بابا وماما ربنا يرحمهم
هالة*فضلت بصالوا وقلبها بيدق اوى وحسيت بالحزن الـ ف عنيه*
صدقى*طبطب ع كتافه*:انا اسف، ربنا يرحمهم ،والبركة فيك برده ،عن اذنكم *واتحرك عشان يمشى بس هالة كانت لسه واقفة وباصه لسليمان وهو باصصلها وبعد كدا رجع تانى وحط ايده ع كتفها*:هالة ،يلا ياحبيبتى عشان نمشى *وبعد ما مشيوا*
غادة:هو مين ده؟
سليمان*بتنهيدة*:ابوه زميلتى ال غنيت معاها
غادة:بصراحة صوتها كان هى كمان حلو اوى وحسيتكوا لايقين ع بعض اوى مش كدا ياموهاب
موهاب:بصراحة اة جدااا
سليمان*بصلهم وابتسم وسكت*
هالة*مشيت مع باباها ورغم نجاح الحفلة بس كانت حاسة احاسيس كتير جواها مش فهمها وعمالة تفكر ف كل ده فرحانة،زعلانة،مبسوطة،خايفة ،عايزة تقرب م سليمان وف نفس الوقت عايزة تبعد عنه!! ماكنتش قادرة تحدد حاجة وبعديها كل واحد يروح بيته وتعدى ايااام وتكون قربت امتحانتهم *
ولاء :جهزى نفسك هنطلع رحلة
هالة*بصدمة*:رحلة ايه انتى بتهزرى؟الامتحانات قربت وانتى تقولى رحلة
ولاء:اة والله مبهزرش ف رحلة هتطلع ف اجازة نص السنة يعنى بعد الامتحانات ما تخلص وكتبت اسمك
هالة: بس انا مش هعرف اطلع انتى عارفة ان بابا وماما م اخر مرة ف موضوع الحادثة ده ورافضين اغيب عن عنيهم لحظة متهايئلى صعب انهم يوافقوا انى اطلع الرحلة دى
ولاء :وفيها ايه يعنى وكمان دى رحلة يومين الفيوم، والفيوم مش بعيدة حاولى تقنعيهم بقى ونبى انا عارفة هتقدرى ولو مقتنعوش هاجى اقنعهم انا بنفسى
هالة*بتنهيدة* :ماشى بس هو انتى *وترددت شوية*:عرفتى مين هيطلع تانى
ولاء*ابتسمت وغمزتلها*:لو قولتيله انك طالعة هيطلع اكيد
هالة :هو مين ده
ولاء: يابت عينى ف عينك كدا
هالة*ابتسمت*: بجد رخمة *وقالت بتنهيدة*:عموما انا حاسة انه هيطلع
*وشوية وروحت وكان باباها ومامتها قاعدين مع بعض بيتكلموا هالة خرجت م الاوضة ووقفت قصادهم وقالتلهم:انا عايزة اتكلم معاكوا ف حاجة!!!
ياترى ايه الهيحصل هنعرف الجزء التامن.
تأليف:فاطمة هشام