رواية أعيش حياتى (الحلقة السابعة عشر)
جاري التحميل...
الحلقة السابعة عشر
.........
*وطبعا العيلتين يجهزوا عشان المصيف وكانوا اكتر اتنين فرحانين بالرحلة دى سلمى وفارس واخيرا ييجى وقت السفر ويكون زهران جايب مينى باص عشان يجمع العيلتين مع بعض وينزلوا يتجمعوا قصاد العمارتين بتوعهم*
زهران*ابتسم وكان شايل شنطة سفر كبيرة*:صباح الخير
رأفت*ابتسم وكان شايل شنطة سفر*:صباح النور
كاميليا:انا جهزت كل الاكل الـ احنا هنحتاجه ف الطريق
هدى:وانا جبت ترمس الشاى وشوية مقرمشات وتسالى عشان طول الطريق
امينة:انا عايزة اقعد ف الاول عشان اعرف افرد رجلى
درية:اكيد احنا هنقعد ف اول كراسى الشباب هما الواره بقى
ابراهيم*بهزار*:ايوه انا هقعد واره مع الشباب
امينة*ابتسمت*:شباب طب اوعى تكون نسيت دوا الضغط ياشباب
ابراهيم:ديما كدا حبطانى
فارس:انا مبسوط اوى اننا هنسافر مع بعض
سلمى: وانا كمان بجد مش مصدقة هنروح البحر سوى وهننزل نعوم هو انت بتعرف تعوم
فارس:يعنى مش اوى
فؤاد* كان واقف بعيد وماسك موبايله عمال يقلب فيه*
رأفت* قرب منه *:لا انا عايزك كدا تتفاعل معانا احنا اجازة ده انا جيبهالك بطلوع الروح والله كتر خير يارا هى القالت موافقة تشيل الشغل كله لحد ما ترجع
فؤاد* اول ماهو جاب سيرتها افتكرها وافتكر م اخر مرة حاول يحسن معاملته معاها اى نعم مش بيهزر ولا بيتكلم بس ع الاقل كان بيبتسملها او يقولها صباح الخير او عاملة ايه يعنى ماكنش بينهم كلام كتير*
رأفت:شوف بقولك ايه وانت بتعمل ايه سرحت ف ايه دلوقتى
فؤاد*ابتسم وحط موبايله ف جيبه*:انا معاك اهوه تحب اعمل ايه دلوقتى
رأفت:تعالا اقف معايا انا وزهران عشان نظبط الشنط
*وراح فؤاد معاه وفضلوا يتكلموا وشوية ولقه تاكسى بيقرب ناحيتهم وبينزل فهيم*
رأفت* قرب وخد الشنطة بتاعته*:بجد مبسوط انك جيت يابابا والله
فهيم:عشان خاطركم والله وابراهيم كمان كلمنى وفضل يقنعنى ووافقت *وقرب ناحيتهم*
درية*اول ما شافته*:طيب انا هطلع بقى اللحق مكان
فهيم*بستغراب*:شوف الولية هو احنا ف اتوبيس مدرسة ولا ايه؟ يعنى ايه تلحق مكان مش فاهم انا؟
ابرهيم*يمسكه م دراعه ويضغط عليه مرتين *:متاخدش ف بالك قولتلك طول الرحلة خليك معايا ملكش دعوه بيها
فهيم*بص عليها لما طلعت وقعدت ع الكرسى الاولانى*
عزيز*يقرب ناحيتهم ويبتسم*:تروحوا وترجعوا بالسلامة
رأفت :الله يسلمك مش كنت جيت معانا
عزيز: تتعوض المرة الجاية ان شاء الله
زهران:ان شاء الله وحتى لو عايز تجيب حد معاك عادى
عزيز:حاضر والله هنبقى نظبطها ان شاء الله
فهيم: لما ارجع بأذن الله هاجى اشرب القهوه بتاعتى عندك
عزيز:ماشى هستناكم وهستناك انت كمان يا استاذ ابراهيم
ابراهيم* ابتسم *:ان شاء الله
*وفضلوا يتكلموا معاه وبعديها مشى وطلعوا كلهم الباص ,كانت درية قاعدة جمب الشباك وامينة قاعدة ع الكرسى الجمبها ع الحرف والكرسيين الجمبهم فهيم جمب الشباك وابراهيم ع الحرف التانى عشان يفصلوا القوات عن بعضهم وف نفس الوقت يكون قاعد جمب مراته ,,و واره هدى وزهران جمب بعض وكاميليا ورأفت جمب بعض وسلمى وفارس طبعا قاعديين جمب بعض يلعبوا وفالاخر فؤاد
وطبعا كان كله بيتنقل بس معادا الكبار وعدى طول الطريق ع خير وشوية ووصلوا عند امال وتكون واقفة هى وعادل جوزها تحت العمارة بيستقبلوهم اول ما تشوفهم تبتسم وتقرب عليهم بترحاب وبالاخص مامتها واختها وبرده سلمت ع كاميليا وكانت لسه بتتعرف عليها وخدوهم وطلعوا شقتهم*
فؤاد*كان قاعد ماسك ف الموب ويبصلهم شوية وشوية يبص ف موبايله*
عادل:منورنا ياجماعة بجد
زهران*ابتسم*:ده نورك ياعادل والله
عادل*بصلهم وابتسم*:انا جهزت طبعا شقتين شقة لحضرتك*وبيشاور ع رأفت*:وشقة لحضرتك ياعمو *وبيشاور ع ابراهيم *:وطبعا شقتكم يازهران والتلاتة ف نفس الدور
زهران:تسلم ياعادل والله
*سلمى كانت قاعدة مع ريهام بنت خالتها الكانت ف نفس سنها *
ريهام:انا مبسوطة اوى احنا هنلعب كتيـــر مع بعض
سلمى:اة وفارس كمان معانا
ريهام*بضيق*:بس احنا هنلعب اللعاب بنات وبس مش هينفع ولاد
فارس*بصلها*:ما انا وسلمى بنلعب مع بعض عادى
ريهام :بس انا مابحبش اللعب مع الولاد
فارس*بزعل واسلوب طفولى*:يعنى ايه يعنى هلعب مع مين انا دلوقتى
سلمى*بحب*:معايا يافارس متخافش مش هسيبك تلعب لوحدك
ريهام:اووووف بقولك ايه اللعب مع وليد الولاد بتلعب مع الولاد والبنات مع البنات
فارس*بستغراب*:مين وليد ده
ريهام:اخويا
هدى:هو وليد فين صحيح
امال: لسه واخد الاجازة ف راح يخرج مع اصحابه مقولكيش ع 3اعدادى والبيحصل فيها ده انا طلع عينى والله , ادعيلى ونبى ينجح ويدخل ثانوية عامة
هدى: ان شاء الله
كاميليا:ان شاء الله ينجح ويجيب مجموع عالى كمان
امال*ابتسمت ابتسامة صغيرة*:شكرا
فهيم:طيب ياجماعة انا تعبت م السفر وعايز استريح
درية: يووه ، احنا لحقنا نقعد
فهيم: ياستى انا تعبان اقعدى انتى براحتك انا جى م سفر والاتوبيس تعبلى ضهرى
درية: يعنى احنا اللى جايين بطيارة ما احنا كنا ف نفس الاتوبيس
فهيم:هو انتى هتفضلى تردى عليا كلمة بكلمة كدا كتير والله لاخد بعضى * ولسه هيكمل*
ابراهيم*وقف بسرعة واتكلم*: ايوه فعلا انا عايز المفاتيح عشان اريح
امينة*وهى بتمسك رُكبها وبتقوم*:اى يا رُكبى وانا كمان والله السفر ده شئ متعب جدا
عادل وامال *رغم استغربهم م حوار درية وفهيم بس سلملهم المفاتيح وفعلا كل واحد نزل شقته عشان يرتاحوا وناموا وطبعا (عيلة زهران وهدى وسلمى) ف شقة والشقة القصادهم (كاميليا ورأفت و فارس وفهيم) والشقة ال ف نص (ابراهيم وامينة وفؤاد) ودرية قالت هتبات عند بنتها وده كان الدور ال فوقيهم بالظبط وناموا كلهم وتانى يوم يبدأوا يجهزوا عشان يفطروا ويكون ف جُنينة ف الدور الارضى بيتجمعوا كلهم سوى*
فارس:ماما انا عايز اروح البحر
كاميليا:حاضر ياحبيبى بعد الفطار
سلمى: ماما هنروح البحر امتى
هدى :افطرى كويس عشان نروح
سلمى:طيب
زهران: حاسس انى مانمتش كويس بفكر لطلع انام
رأفت: ده كانوا العيال كلونا خلينا ياعم نوديهم ونرجع ننام براحتنا
زهران: هيقولوا عايزين نتفسح بليل
رأفت: نتفسح يوم تانى الاسبوع لسه طويل
امينة: تسلم ايديكوا والله الفطار طعمه حلو اوى وبالآخص الجبنة والزيتون
امال:اة هنا مشهورين بالجبنة المطروحية
درية:بالهنا والشفا ياحبيبتى
ابراهيم وفهيم*نازلين م ع السلم وكان كأنه بيشده م دراعه*: ياراجل تعالا بقى اكيد مش هتفضل طول الرحلة قاعد فوق ف الشقة يعنى
فهيم :مش طالبة حوارات يا ابراهيم
ابراهيم :تعالا بس افطر ولا هيحصل حوارات ولا حاجة
ابراهيم:صباح الخير ياجماعة
الكل: صباح النور
فهيم* اختار ابعد كرسى وراح يقعد بعيد عن درية وكان بينهم نظرات نارية*
ريهام :انا هحضر المايوه بتاعى وهاجى معاكوا
سلمى:ماشى وكمان انتى بتعرفى تعومى انا وفارس مابنعرفش عشان تبقى تعلمينا ف الماية
ريهام *بصيت لفارس بضيق*:هعلمك انتى ,هو لا
سلمى: ليه بس ياريهام
ريهام:انا مش بحب اتعامل معاهم خانقيين اوى
سلمى *وهى بتبص ع فارس وتبتسم*:بس صدقينى فارس مش خنيق ده لذيذ خالص
ريهام: مليش دعوه بى برده
فارس *كان واقف بعيد عنهم ورغم انه مش سامع بس كان حاسس ان ريهام مش طيقاه وشوية ولاقة حد قرب ناحيته*
وليد :واقف كدا ليه يامعلم
فارس*بصله بستغراب*:انت مين
وليد:انا المفروض اسألك انت ده بيتنا وعماراتنا
فارس:انا فارس
وليد :ايوه فارس مين يعنى
عادل*قرب منهم*:ماترخمش عليه ياوليد فارس ضيف وجى يصيف مع عيلة خالتك ما انت لو كنت موجود امبارح كنت عرفت واتعرفت عليهم
هدى: وليد تعالى ياولد انت وحشتنى
وليد *قرب منهاوحضنها*:وحشتينى ياخالتو
هدى: وانت كمان ياحبيب خالتك طمنى بقى هترفع راسنا ولا ايه
وليد: ان شاء الله *وبص لقه سلمى قرب منها وحضنها *:وحشتينى
سلمى*ابتسمت*:وليد انت كمان وحشنى
فارس *شاف كدا حس انه اضايق اوى*
وليد *مسك ايديها*:انا هجيب السودانى ونقعد انا وانتى والبت ريهام ناكله ونرمى القشر ع الناس زى ما بنعمل كل مرة
فارس: بس ده غلط وعيب
وليد* بصله بسخرية*: روح اللعب بعيد ياشاطر
فارس* بصله واضايق*
سلمى *بعدت ايديها عن وليد وقالت بطفولة*: لا مش هيلعب بعيد هيلعب معانا
وليد *ضحك*: لا انا مش قصدى كدا عموما نبقى نشوف الموضوع ده بعدين
*وفضلوا قاعدين يتكلموا وخلصوا فطار*
رأفت*قام وقف*:ها ياجماعة مين الهيروح البحر
سلمى وفارس وريهام:انــــــــــــــــا
هدى وكاميليا:طبعا هنيجى
درية:انا مش جاية
فهيم* لنفسه:احسن برده*
هدى: ليه بس ياماما
درية :يوم تانى عايزة اقعد اتكلم مع اختك شوية
امال: وانتى كمان وحشانى ياماما وعايزة اتكلم معاكى كتير
عادل :انا كان نفسى اجى معاكوا بس عندى شغل انا لسه اجازتى هاخدها بعد يومين
امينة:هو البحر بعيد ولا قريب
ابراهيم: ده قريب جدااا
امينة: ايه الثقة الـ بتكلم بيها دى كأنك محافظ مطروح
ابراهيم :ياستى انا شوفته واحنا جايين وكمان فؤاد فين
امينة:بيقول هينام مش قادر ينزل عايز يستريح قولت اسيبه براحته عشان باقى الرحلة يفوء
ابراهيم:ماشى
امال: روح ياوليد معاهم وخلى بالك م اختك
وليد*بضيق*:بس انا عايز اخرج مع اصحابى
امال :مينفعش قرايبك يبقوا هنا وتسيبهم وتخرج واحنا سيبناك امبارح براحتك خلاص بقى
وليد*بتنهيدة*:طيب
فهيم: انا كمان هروح البحر*وبص لدرية*:هقعد هنا اعمل ايه يعنى مش مكانى
*وفضلوا يجهزه ويتحركه عشان يروحوا البحر وبعد شوية يوصلوا*
امينة*وهى ماشية ع الرملة*:هو ده القريب اة يا انا يارجلى
ابراهيم*ابتسم عشان ضحك عليها عشان ترضى تيجى*:هو كان قريب معرفش ايه البعده كدا
امينة:هيكون بيتحرك يعنى لى رجلين مش زيي, اة يانا يارجلى
ابراهيم:خلاص بقى يا امينة
سلمى* فرحت اول ماشافت البحر*:يلا يافارس عشان ننزل
فارس*ابتسم*:يلا بينا
سلمى: يلا ياريهام
ريهام *رغم انها اضايقت م فارس بس نزلت و وليد فضل ع الشط يلعب بالرمل ,زهران ورأفت فضله يلعبوا شطرنج ,ابراهيم وفهيم قاعديين يستمتعوا بالجو ويتكلموا شوية ومستنيين دورهم عشان يلعبوا, امينة وهدى وكاميليا قاعديين سوى وبيعملوا الساندوتشات عشان لما يجوعوا, وف الوقت ده*
امال:ماروحتيش ليه ياماما معاهم
درية:مليش مزاج
امال:انا حاسة ان ف حاجة تانية هو عمو ال اسمه فهيم ده مضايقك ف حاجة
درية*بتتكلم بثقة*:هو ف حد يقدر يضايقتى
امال: مش عارفة بس حاسة انى مش مرتاحة كدا
درية:يعنى ف بينا شوية خلافات
امال:بصى هو بصراحة انا كنت مش عجبانى العيلة دى ومش نزلينلى م زور بس بعد ما شوفتهم يعنى حاسة انهم عادى بس برده مش فاهمة تمسك هدى بيهم وتمسكك بطنط امينة يعنى
درية:ع فكرة هما مش وحشين وكفاية الموقف بتاع سلمى ياعالم كانت هتبقى فين دلوقتى وبيحصل فيها ايه وامينة واحدة زيى ويمكن اكبر منى شوية بس بنقدر نفهم بعض هو المشكلة ف فهيم ده المش عارفة حاطيت نقره م نقرى ليه راجل غريب
امال: انا ماقولتش وحشيين بس عاديبن يعنى عموما مش عايزاكى تضايقى م حاجة واستمتعى بوقتك وكمان لوعايزة بعد ما يمشوا تفضلى انتى معايا شوية يبقى ياريت ياماما والله
درية:لا مش للدرجة دى انتى عارفة مابقدرش اسيب بيتى كتير ده انا باجى بس اغير جو
امال:ماشى ياماما زى ما تحبى
*وف الوقت ده تكون سلمى وفارس وريهام ف البحر وعمالين يلعبوا بالمية ومبسوطين*
سلمى:علمينا ياريهام بقى
ريهام: بصى بتحركى رجلك ليمين وشمال كدا وايدك تعمليها كدا كأنك هتفتحى دايرة بس متقفليهاش خالص تخليها نص نص
فارس*وهو بيحاول يعمل زى ما بتقول*:انا مش فاهم ازاى
ريهام*بضيق*:انا بعلم سلمى بس اصلا
سلمى:ريهام متكلميش فارس كدا هو عايز يتعلم زيي عشان مابيعرفش يعوم
ريهام :اووووف
فارس*بحزن*:خلاص انا هطلع شوية
سلمى: ليه خليك
فارس:عايزاللعب بالرملة
سلمى:خلاص هاجى معاكى
ريهام *بضيق*:وهتسبينى وتطلعى معاه هو
سلمى *بصتلها وبصتله*
فارس: خليكى انتى انا شوية وهنزل تانى
سلمى:ماشى
*وفضلت تتحرك وتلعب وشوية وطلع فارس وكان وليد بيعمل بيت بالرمل*
فارس: الله شكله حلو اوى
وليد :تعالى اعمله معايا *وقعد جمبه وفضله يبنوا سوى وفارس كان مبسوط اوى واول ما خلصه*
فارس*ابتسم*:هنادى لسلمى تشوفه
وليد* قام وقف وداس عليه برجليه*
فارس*بصدمة*:ليه عملت كدا؟
وليد*ضحك بسخافة*:ما كل مرة بحب اعمل كدا
فارس*بحزن*:بس انا كنت عايز اوريه لسلمى
وليد*بضيق*:اصلا انت ماينفعش تكلم سلمى كتير كدا ,الولاد تقعد مع الولاد والبنات تقعد مع البنات ف فكك بقى
فارس:لا بس انا وسلمى اصحاب وبنحب نلعب سوى
وليد: بس انت لسه صغير!! انا معلم اختى انها مينفعش تلعب مع الولاد ده غلط ولما تكبر هتعرف ده
فارس*بصله بضيق ولسه هيتكلم*
سلمى وريهام *قربوا منه*
سلمى: بتعملوا ايه؟
وليد*مسك ايديها*:تعالى, بعمل بيت تحبى ابنيلك واحد زى كل مرة لما بتيجى كنت بعملهولك
سلمى*بفرحة وتنطيت*:اة ياريت ياوليد بحب البيوت دى اوى
*وليد قاعدها جمبه وفضلوا يعملوا مع بعض و سلمى اندمجت ف الحفر وفارس شاف كدا اضايق اوى وقرر ينزل البحر لوحده وشوية وسمعوا صوت صويت وان ف طفل بيغرق....وللحكاية بقية
هنعرف الحصل الحلقة الجاية
تأليف:فــاطــمــة هــشــــام