عهد الدم الباب الذي لا يقفل
جاري التحميل...
الباب الذي لا يقفل
.........
لم يستطع يوسف أن يصرخ.ليس لأنه لا يريد…
بل لأن صوته… لم يعد ملكه.
يده كانت ترتفع ببطء نحو رقبته، أصابعه متيبسة… كأنها تتحرك بخيوط غير مرئية.
حاول يقاوم… شدّ عضلاته… ضغط أسنانه بقوة لدرجة أنه شعر بطعم الدم في فمه…
لكن—
لم يتوقف.
اقتربت أظافره من جلده… مليمترات قليلة…
وكان يشعر بالبرودة تسبقها… كأن الموت نفسه يمد يده نحوه.
"قولتلك… متقاومش."
الصوت خرج من داخله… هادي… ثابت…
مش بيهدد… لكنه عارف إنه كسبان.
وفجأة—
توقفت يده.
قبل ما تلمس رقبته بلحظة.
شهق يوسف بعنف، وسحب إيده بسرعة كأنه هرب من حافة هاوية، ووقع على الأرض وهو يلهث… عرقه نازل بغزارة، وعينيه تايهة بين المراية والضلمة اللي حواليه.
"إنت… إنت عايز إيه؟!" صوته خرج مكسور… ضعيف… لكنه كان حقيقي المرة دي.
سكون.
ثم—
"فاكر البيت ده؟"
اتجمد.
نظر حوالين نفسه ببطء… الجدران… السقف… الأرض…
كل حاجة فجأة بقت غريبة… مش مألوفة زي الأول.
"بيت جدي…" همس.
ضحكة خفيفة… جافة…
"مش كله."
اتسعت عينيه.
"يعني إيه؟…"
لكن قبل ما ييجي الرد—
خبط.
صوت واضح… تقيل… جاي من بره الأوضة.
يوسف لف رأسه بسرعة ناحية الباب.
خبط تاني.
أبطأ.
أقرب.
"يوسف…"
الصوت كان مختلف.
مش نفس الهمس اللي في دماغه…
الصوت ده… كان حقيقي.
جاي من بره.
وقف بصعوبة، رجليه بتترعش… لكن فضوله—أو رعبه—كان بيسحبه ناحية الباب.
"مين؟…" قالها وهو بيقرب.
"افتح…"
الصوت كان واطي… متحشرج… كأن اللي بيتكلم تعبان… أو مجروح.
مد إيده ناحية المقبض…
وقف.
حاجة جواه كانت بتصرخ: متفتحش.
لكن حاجة تانية… أهدى… أخطر… كانت بتهمس:
"افتح… عايزك تشوف."
بلع ريقه…
ولف المقبض ببطء.
الباب اتفتح.
الطرقة كانت ضلمة.
أضلم من الأوضة نفسها… كأن النور بيرفض يدخلها.
"فيه حد؟…"
مفيش رد.
خطوة.
خطوتين.
خرج من الأوضة.
الأرض كانت باردة… بشكل غريب… كأنها مش أرض عادية.
وبعدين—
شافه.
في آخر الطرقة…
باب.
يوسف وقف.
"الباب ده… مكانش هنا…"
كان قديم… خشب أسود… متآكل…
وفيه علامات محفورة… خطوط متشابكة… كأنها كتابة… أو جروح.
قلبه بدأ يدق بسرعة.
"قرب…"
الصوت رجع تاني… جواه.
بص للباب…
كل حاجة فيه كانت غلط.
لكن رجله اتحركت.
خطوة…
خطوة تانية…
لحد ما بقى واقف قدامه.
مد إيده…
وقبل ما يلمسه—
صرخة.
عالية.
مليانة ألم.
جايه من جوه الباب.
يوسف سحب إيده بسرعة، رجع لورا وهو مخضوض.
"فيه حد جوه؟!"
صمت.
ثواني…
ثم—
خبط من جوه الباب.
بعنف.
مرة… اتنين… تلاتة…
"يوسف… الحقني…"
الصوت…
كان صوته.
اتسعت عينيه لدرجة وجعته.
"إزاي…؟!"
"أنا جوا…
متسيبنيش…"
رجع خطوة لورا… رأسه بيلف… مش قادر يستوعب.
"ده مش حقيقي…"
"ده أنت."
الصوت اللي في دماغه رد… بهدوء.
"اللي برا… مش أنت."
سكت لحظة…
ثم قال:
"الحقيقي… محبوس."
يوسف بص على إيده…
الجرح لسه بينزف.
وببطء…
رفع عينه ناحية الباب.
الخبط رجع تاني.
أقوى.
أعنف.
كأن اللي جواه بيخبط عشان يهرب…
أو عشان يخرج.
"افتح…"
الهمسة كانت قريبة جدًا…
لدرجة إنه حس بيها على شفايفه.
"واخد مكانك."
إيده ارتفعت.
تاني.
بس المرة دي…
مكانتش رايحة لرقبته.
كانت رايحة—
للباب.
نهاية الفصل الثاني 🩸🚪🖤