أعيش حياتى | الحلقة الخامسة
جاري التحميل...
الحلقة الخامسة
.........
*وطبعا انبسطوا فارس وسلمى ان حقهم رجع واطمنوا ان عمار مش هيضايقهم تانى وتعدى فترة ويرجع فارس المدرسة وهما كمان ويقف ممدوح ويمسك المايك ويقول ف الطابور*
ممدوح:طبعا كلنا عرفنا الـ زمايلكم عمالوا ف زميلكم فارس وده طبعا تصرف مش صح واتعاقبوا عليه جامد اوى بس مش كفاية هما لازم يبانوا انهم ندمانين جدا ويعتذروا لفارس قدامكم كلكم ,تعالا يافارس
فارس*خرج م الطابور وكان وشوا الكدمات فيها بسيطة ودراعه كان لسه متجبس وبعد ما سمع اسمه اتحرك ووصل عند صف البنات وبص لسلمى وقرب ايده منها*:انتى كمان لازم يعتذرولك
سلمى*ابتسمت ومسكت ايده*
*عمار كان باصص بغيظ وبينه وبين نفسه عمال يستحلفلهم وزمايلوا كانوا مضايقين م الحصل وكانوا مكسوفين م نفسهم اوى خصوصا كل المدرسة بصالهم بضيق وقرب فارس ناحيتهم هو وسلمى*
ممدوح*قرب المايك منهم هما الاربعة*
الاربعة:احنا اسفين يافارس وده مش هيتكرر تانى ،سامحنا لو سمحت
فارس*بص لعمار*:اعتذر لسلمى عشان شدك لشعرها وانك زقيتها
عمار*بصلها ع مضض وسلمى مسكت ايد فارس جامد*:انا اسف ياسلمى مش هعمل كدا تانى
ممدوح*ابتسم*:سامحتهم يافارس
فارس*بصلهم بضيق وخصوصا لعمار*:ربنا يسامحكم
*ورجعوا كل واحد ع مكانه وف وقت البريك قاعدوا الاربعة مع بعض*
تسنيم:انا ابسطت اوى وانا شيفاهم بيقولوا اسفين
قاسم:بس انا مش مطمن لعمار ده ،ده واد شرانى
سلمى:انا كمان بحسه شرير اوى
فارس:ولا يقدر يعمل حاجة خلاص
*وفضلوا يتكلموا وف الوقت ده عمار قرب م اصحابه*
عمار:انتوا مخصمنى ولا ايه
زياد:عمار احنا مش عايزين مشاكل
رامز:احنا روحنا ف داهيه بسبب افكارك
وليد:انا شايف خلاص كدا
عمار*بصلهم بأرف*:انتوا فكرنى هتحايل عليكم خلاص احسن وع فكرة هترجعوا تكلمونى تانى وانا الهقولكم لا *ومشى وسابهم وهما ماهتموش وتعدى فترة ويشيل فارس الجبس واول ما يشيلوا يروح لباباه*
رأفت:ايه عايز تنزل الجيم؟؟
فارس*وهو بيحرك دراعه*:اة عايز اعمل عضلات
كاميليا:بس ياحبيبى انت لسه فاكك الجبس مش هينفع دلوقتى
رأفت:ولا حتى بعدين يا ابنى انت جسمك لسه بيتبنى ولسه صغير ما ينفعش تعمل عضلات او تشيل حديد دلوقتى خالص
فارس*بضيق*:بس انا عايز اكون قوى عشان اى حد ييجى ناحية سلمى اضربوا
كاميليا*ابتسمت*:ناحية سلمى،يعنى مش عشان لو حد فكر يضربك انت
فارس:سلمى اهم ياماما
رأفت*بص لابنه*: بص ياحبيبى انا اقدر دلوقتى اخليك تلعب كاراتيه او تايكوندوا لحد ما تكبر شوية كام سنة كمان واوديك جيم تظبط جسمك وتعمل العضلات العايزها لكن دلوقتى صعب جدا
فارس*بضيق*:طيب
رأفت:خلاص بعد ما تخلص امتحانات نص السنة تدرب ف النادى
*وتبدأ الامتحانات وبعديها تيجى الاجازة ويروح فارس يدرب ف النادى وطبعا سلمى راحت تدرب معاه كاراتيه وكانوا طبعا ف الاجازة لو عايزين يتكلموا بيفضلوا ياخده موبايلات مامتهم ويتكلموا وساعات ماكنوش بيعرفوا يتكلموا عشان هما عايزين الموبايلات*
كاميليا:هات يافارس الموبايل بقى عايزة اكلم جدتك فحاجة
فارس:بتكلم مع سلمى ياماما
كاميليا:ع فكرة الوقت اتأخر ولازم تناموا
فارس:مش جاييلنا نوم احنا ف اجازة
*والناحية التانية تظهر هدى*
هدى:هاتى ياسلمى الموبايل عشان اكلم خالتك
سلمى:لسه بنتكلم
هدى:ياحبيبتى ما انتوا بتشوفوا بعض ف النادى ماتتكلموا ف النادى وقولوا كل كلام
سلمى:بيبقى ف كلام تانى اكتر
هدى*بتنهيدة*:طب معلش كملوا بكرة
سلمى*بحزن*:هقفل يافارس بقى معلش
فارس:وانا كمان سلام
*ويقفلوا مع بعض ويفضل يفكر فارس ف طريقة يعملها عشان يتكلموا بيها وتصحى سلمى الصبح وتكون بتفطر مع عيلتها وشوية وتسمع صوت جرس ف البلكونة تستغرب وتروح ناحيتها ويكون عمل حبل يتوصل مابينها وبينهم وف اخره م ناحيتين جرس عشان لو هو عايزها يحرك الحبل ف تسمع الجرس وتروح البلكونة وهى كمان لو عايزاه تحرك الحبل وهو يروح ع البلكونة* :ايه رأيك
سلمى*بأنبساط*:حلو اوى عملته ازاى
فارس:قولت الفكرة لبابا وهو وعمو زهران عملوا م شوية
سلمى* وهى بتحرك الحبل بأيديها وبتسمع صوت الجرس وابتسمت*:بجد فكرة حوه اووى
*وفضلوا يتكلموا وطبعا عشان المسافة بينهم ماكنتش قريبة اوى فكانوا اوقات يتكلموا واوقات يعملوا لغة اشارة بينهم زى هنام ،هاكل ،هنزل ،هلعب زى لعبة الافلام كدا وكانوا هما الاتنين بيخترعوا حركات ماحدش غيرهم كان فهمها وتعدى فترة ويبدأوا الترم تانى وف يوم يكون ماتش الاهلى والزمالك*
زهران:ها هنتفرج عندى ولا عندك
رأفت:عادى ف اى بيت
زهران:هو انت اهلاوى ولا زملكاوى صحيح
رأفت*سكت شوية*:انت ايه؟
زهران:اهلاوى
رافت:انا كمان اهلاوى
زهران*ابتسم*:طب تمام ايه رأيك بقى تيجوا عندى ونعملكوا غدوه حلوه بدل الباظت قبل كدا
رأفت:لسه فاكر !! الاوردر اللى طلبته كله يبقى موجود
زهران:ياعم تعالا ادعى ماتحصلش حاجة تانية بس واليوم يتقلب ولا حاجة
رأفت:لا ان شاء الله خير
زهران:ان شاء الله خلاص,هنستناكم واعمل حسابك فيه تشرتين نلبسهم واحنا بنشجع
رأفت*سكت*
زهران:الو انت معايا
رأفت:اة معاك ,خلاص ماشى *وقفل معاه وقال لكاميليا وكانوا بيجهزوا عشان يرحولهم وشوية والباب خبط*
زهران*وهو بيفتح الباب*:اتأخرتوا كدا ليه *واول ما فتح لاقه درية بصلها وسكت*
درية:ايه مش هتدخلنى ولا ايه امشى ،اروح بيتى احسن
زهران*ابتسم ابتسامة سمجة*:لا طبعا ياطنط اتفضلى *وعالى صوته*:هدى طنط جت
هدى *خرجت م المطبخ فرحانة وسلمت عليه*:ماما حبيبتى تعالى نورتينى
درية:لاقيتك مابتسأليس قولت اسأل انا ده اختك الـ ف مطروح بتسأل عنك
هدى:غصبن عنى ياماما والله وبصراحة المسافة بينا بعديت اوى كنا ف الاول محطتين دلوقتى بقوا عشر محطات وكمان دراسة سلمى سحلتنى معاها وف الاجازة عايزة ع طول تروح النادى فمكانش ف وقت خالص
درية*وهى بتبص لزهران بضيق*:يعنى هو كان مين السبب ف المسافة دى يعنى ما البيوت كانت كتيرة وقريبة لكن ازاى لازم ناخد ابعد حاجة ف دنيا
زهران*سمعها ومطنش وعمال يقلب ف الـ تى فى وقال بينه وبين نفسه عشان نبعد عنك وعن زنك ياطنط*
هدى:ما كانت غالية بس دى الحمدلله لاقيناها مناسبة المهم بقى اقعدى استريحى عقبال ما اخلص الاكل اصل عيلة كاميليا جايبن ياكلوا معانا النهاردة
درية:طب واقعد ليه ماساعدك
هدى:اة والله ياماما اصل زهران لسه قايلى وانا كنت محتاسة وبدعى انى اخلص بس يعنى عارفة ان كاميليا كدا كدا كانت هتيجى تساعدنى
درية:وتساعدك ليه ياحبيبتى ما امك موجودة*وبصيت بجنب عنيها*:ومفروض الـ يعزم حد ده يقول قابليها عشان الواحد يرتب نفسه ولا ايه
زهران:وبيقولوا الزيارات برده نعرف م قابليها ولا ايه
درية:نعم!!!انت عايزنى استأذن قبل ما اجى لبنتى ولا ايه
هدى*بصيت لزهران بلوم*:لاطبعا مش قصده كدا ،المهم ونبى ركزى معايا انا عارفة بتعملى الحمام المحشى تحفة ساعدينى ونبى
درية*بتنهيدة وبتشمر درعاتها*:م عنيا يا ضنايا
*وشوية وتيجى كاميليا وتقعد معاهم ورأفت يقعد مع زهران وسلمى وفارس بيلعبوا بس كان كل شوية يجرى يعرف النتيجة عشان هو كمان كان بيحب الكورة*
فارس:انا عايز انا كمان تيشرت زى ده
رأفت:لما تكبر تبقى تجيب واحد
فارس:يااااه لسه هستنى كل ده
زهران*ابتسم*:لا طبعا انا هبقى اجبلك واحد
رأفت:لا يازهران ماينفعش *وبص لابنه*:روح يافارس اللعب يلا
فارس*بحزن*:طيب
زهران:ف ايه زعلته ليه انا اصلا كنت هجيب له بس مالاقيتش مقاسه
رأفت:مش عايز اكلفك وكمان خلاص لما يكبر يبقى يجيب اللى هو عايزه
زهران:بقولك ايه انا خلاص قررت انى اجبهوله وما تناقشنيش كتير كفاية عليا حماتى
رأفت:ايه مالها؟؟
زهران:مش بنقبل بعض
رأفت:ليه بس
زهران:هتشوف دلوقتى ست غريبة
وسلمى وفارس* يكونوا بيلعب*
سلمى:انا زهقت كل شوية تروح تشوف الماتش
فارس:اة عشان بحب الكورة
سلمى:ياسلام اكتر منى
فارس:لا وكمان ما انا مش سبتك وبلعب معاكى اهوه
سلمى*ابتسمت*:ماشى
*والناحية التانية ف المطبخ*
درية:برده مفيش فايدة فيكى يعنى ياخايبة مش قادرة تقنعى جوزك تجيبى عيل كمان
هدى*بضيق*:ماما الموضوع ده بيوتر علاقتنا
درية:انا مش فاهمة ايه اللى يمنع ان راجل وست متجوزين يجيبوا عيال لبنتهم *وبصيت لكاميليا*:احضرينا انتى ونبى
كاميليا*بهدوء*:ف موانع ساعات بتحصل غصبن عن الواحد
هدى:بلاش الكلام ده ياماما دلوقتى
درية*بعدم فهم*:موانع ايه؟موانع حمل
كاميليا*ابتسمت*:هقولك
هدى:ياماما خلاص بقى
درية:لا افهم
كاميليا*بصيت لهدى*:عادى مفيش مشكلة مش مضايقة*وفضلت تحكيلها الحصلها*:بس ده سبب م الاسباب يعنى
درية*بعد ما هى خلصت*:طب وانتى وعندك عيب بنتى ايه مشكلتها بقى
كاميليا*اتفجأت لما قالت كدا*
هدى*بلوم*:ماما مابنقولش كدا
درية*بصيت لكاميليا*:ماتزعليش يابنتى منى انا ساعات كلام بيطلع منى م غير تفكير،بس انا قصدى انتى يعنى ف مشكلة حصلتلك لكن انا بنتى الحمدلله تمام
كاميليا*ابتسمت*:انا فاهمة حضرتك بس مادام جوزها رافض خلاص
درية:فتسمعلوا وتستسلم بقى للكلام الفارغ ده
هدى:يعنى اعمل ايه ياماما يعنى
درية:احملى م وراه
*كاميليا وهدى برقوا م الكلمة*
هدى:اكيد بتهزرى
درية:لا بتكلم جد مادام مش عارف الصح انتى تعمليه وكمان لما يلاقيكى حامل ويسمع نبض ابنه اكيد يعنى مش هيموته وهيرجع ع ال ف دماغوا ويعرف انه غلطان
هدى*سكتت وفضلت تفكر ف كلام مامتها*
كاميليا:تسمحيلى ياطنط ده مش صح وماينفعش بكل الطرق واحدة تعمل ده م وراه جوزها ده بيجيب مشاكل كتير ولقدر الله ممكن توصل لطلاق ف ليه بقى م الاول
درية:ولا مشاكل ولاحاجة اى راجل مابيجيش بالزوء ييجى بالعافية مدام مش عايز يقتنع بأن ده الصح خلاص نخليه يعرف بالعافية
كاميليا:مش عارفة بس عموما انا شايفة ده غلط خصوصا ان استاذ زهران شكله رافض جدا *وبصيت لهدى*:ولا انتى ايه رايك
هدى*مسكت راسها*:انا كل البفكر فيه دلوقتى الاكل مايتحرقش ممكن بقى نركز ف الاكل ونسيب كل حاجة لبعدين
درية*بصيت بضيق وسكتت وحاولت كاميليا تفتح مواضيع تانية بس ساعات درية ترجع تتكلم ف نفس الموضوع وبعد ما خلصوا خرجت م المطبخ وشافت*
زهران ورأفت *قاعدين مندمجين اوى قصاد الماتش وبيقولوا*:جوووون* وفرحانين وحضنوا بعض*
درية:والله انا مش عارفة بتفرجوا ع التفاها دى ازاى استفدنا ايه يعنى شوية شباب بتلعب بالكورة وبياخدوا فلوس قد كدا وانتوا قاعديين تشجعوا بحرقة اوى ولما جابوا الجون انبسطوا كأنكم كسبتوا مليون جنيه
فارس*جه بسرعة*:جابوه جون ,يووووووه انا عايز اشوفوا
زهران*بصوت هادى*: مش قولتلك
رأفت*بصوت هادى*:طلعت صعبة اوى بجد*وبصلها وقالها*:تشربى شاى ياطنط
درية*بصتله بجنب عنيها ومشيت*
هدى*وهى خارجة بتحط الاكل ع التربيزة*:مش شرط يستفيده دى يعتبر لعبة ترفيهية بتخرجك برة مود الروتين والحياه انا عن نفسى ساعات بشجع اى نعم انا مابفهمش ف الكورة ولا انا ولاسلمى بس ساعات بنقعد مع زهران نتفرج
كاميليا*وهى كمان بتحط طبق السلطة ع التربيزة*:وانا كمان ساعات بقعد معاهم عشان مبقاش لوحدى وبفضل اشجع ومش فاهمة حاجة خالص *وابتسمت*: وفارس الــ شبر ونص ده البيقعد يفهمنى
درية*بصتلهم بعدم اهتمام*:كلام فاضى صحيح
*وبعد ما الماتش خلص قاعدوا عشان ياكلوا*
درية:كُلى ياسلمى السلطة دى
سلمى:مابحبش السلطة يانينا
درية:ياحبيبتى ده غلط لازم تحبيها دى مفيدة وكمان عشان شعرك يطول بسرعة
سلمى*بحماس*:بجد لو كلته هيطول ع طول
درية:اة ياحبيبتى طبعا ,هو انتى قصتيه ليه
سلمى*لسه هتتكلم*
هدى:عادى تغيير ياماما *طبعا هى مارضيتش تقولها دلوقتى ولا قبل كدا الحصل عشان هتفضل تلومها انها مخلتش بالها عليها وكمان عشان متقلقهاش م الحصل*
زهران:براحتك ياحبيبتى لو مش عايزة تاكلى خلاص
درية :يوه
زهران*بصلها بضيق*:مش حابب بنتى تعمل حاجة غصبن عنها
درية:هو ده هيضرها يعنى ده هيفيدها وكمان دى لسه صغيرة ومفروض تتعلم المفيد من الضار
زهران:اظن احنا عارفين نعلم بنتنا كويس
درية*بسخرية*:طبعا طبعا ,بأمارة البيتزا الـ بتقعد تجيبهالها مجرد عجين ولا ليها لازمة ,وكمان مش عايز بنتك تعمل حاجة غصبن عنها*وبتلمح للحمل*:اشمعنى انت يعنى عايز بنتى تعمل حاجة غصبن عنها
زهران *بضيق*:وبعدين بقـــــااا
رأفت:استهدوا بالله ياجماعة كله الاكل حلو اوى
الكل:لا اله الا الله
سلمى:بابا انا هاكل سلطة عشان شعرى يطول لان فارس بيحب الشعر الطويل
فارس*بصلها وابتسم*
درية: لا ياحبيبتى لما تعملى حاجة تعمليها عشان نفسك مش عشان حد
كاميليا:ياطنط هما صغيرين مش هيستوعبوا ده دلوقتى
درية:ومالو دلوقتى مش فاهمين بكرة يفهموا
هدى:خلاص بقى ياماما
درية:الحق عليا بعرفكوا الصح
زهران*بأنفعال*:ما خلاص بقى ياست انتى
درية:انت بتزعقلى ونبى لانا ماشية ومش جاية هنا تانى ،شكرا يامحترم *وقامت م ع السفرة وهدى وراها *
هدى*مسكتها م دراعها وقفتها*:خلاص ونبى ياماما اصل زهران ف مشاكل ف الشغل عنده فمتعصب شوية بس
كاميليا:معلش ياطنط عشان خاطرنا احنا برده يعتبر ضيوف
رأفت*بلوم*:اهدى بقى يا زهران مش كدا يا اخى
سلمى*بحزن*:ماتمشيش يانينا خليكى معانا شوية
فارس*بيقرب م ودنها*:خليها تمشى احسن بتتكلم كتير
سلمى*بصتلها بعفوية*:خلاص امشى يانينا
درية*رفعت حاجبها*:قالك ايه الواد ده هه
هدى:ياماما خلاص بقى دول عيال
زهران*وهو قام وقف*:انا شبعت هقوم اشرب سيجارة
رأفت:خدنى معاك *ودخلوا البلكونة*:خلاص بقى اهدا
زهران*وهو بينفخ ف السيجارة*:ست فظيعة بجد
رأفت:معلش كل الستات الكبيرة كدا
زهران:لا مش كلهم ف ستات تانية احسن م كدا بكتير
رأفت:معلش عشان خاطر هدى اكيد مش هتحب انك تحرمها م امها
زهران:نفسى, بس عارف انه حرام
رأفت:طبعا حرام كله الا صله الرحم وكمان انا نفسى اعرف اتجوزتها ازاى وامها بالشكل ده
زهران:مشكلة امها ان ابوهم مات بدرى ف هى بقيت كل حاجة لبناتها الاتنين وبقيت تعقب ع كل حاجة وتركز ف كل حاجة بطريقة خنيقة بس زى اى ام نفسها بنتها تتجوز فكانت اول ما اتقدمت تفرشلى الارض رمل بس ساعات كانت بتخنق عليا ف حوارات الشقة والجهاز واصريت اننا نسكن قريب منها رغم الايجار كان عالى عليا جدا ووافقت ودلوقتى بقى مش مكفيها عمالة تملاه دمغها بأننا نجيب عيل كمان عشان كدا عزلت م المكان الـ احنا فيه م كتر زنها قولت ع الاقل هتيجى هنا كل فين وفين
رأفت:طب وايه اللى يمنع تجيب عيال تانى
زهران:زى ما قولتلك م شوية خلتنى ابقى ف شقة ايجارها عالى وطبعا اضطريت احرم نفسى م حاجات كتير واحرم هدى كمان عشان نعرف نغطى ع مصارفنا ومع حملها الموضوع كان اصعب بس اول ما جت سلمى كانت رزق كبير ف حياتى والفلوس ظبطت بس برده كنت بحاول ابقى واحدة واحدة ع قد مقدر لحد ما كونت فلوس شقة مِلك ونعيش ف مستوى كويس والحمدلله حصل ودلوقتى بقى عايز نعيش حياتنا احنا اتحرمنا كتير فنستمتع بالفلوس دى ونسافر ونخرج ونعمل كل العايزينوا وبرده نأمن مستقبل سلمى انا م الاخر امكانياتى واقفة ع سلمى بس اكتر م كدا الميزانية تنهار
رأفت:بس مادام مفيش حاجة تمنع افرض ده حصل ف يوم م الايام هتعمل ايه
زهران*بتنهيدة كبيرة*:مش عارف بس ان شاء الله مايحصلش بص انا مش ممانع رزق ربنا بس انا بجد عايز اعيش مرتاح انا وعيلتى
رأفت:ان شاء الله ،بس عارف سبحان الله انا غيرك تماما لو ماكنش حصل الحصل ده مع كاميليا كنت زمانى جايب دستة
زهران:ربنا يعوضكم خير ويخليلكم فارس
رأفت:هو فعلا عوضنا بيكوا وعوض فارس بسلمى *وسكت شوية*:بس عارف لو كنت جبت دستة كانوا زمانهم جننوا الست اللى برة دى وماعرفتش تتكلم معانا
زهران*ضحك*:ربنا يهديها
رأفت:يارب ,معلش بقى اعصر ع نفسك ميت لمونة واخرج اعتذرلها هى زى والدتك برده
زهران*بتنهيدة*:ربنا يرحمها
درية* قعدت شوية وفضلوا يتكلموا معاها*
هدى:خلاص ياماما ماتزعليش بقى
درية:انا نفسى اعرف غلطت ف ايه انا عايزة مصلحة حفيدتى
كاميليا:طبعا ياطنط وعندك حق وحتى هخلى فارس كمان ياكل السلطة الخضرة
درية:طبعا يابنتى هما بيتبنوا دلوقتى ده مفيد ليهم
فارس:هى ممكن تبنيلى عضلات
درية:ايوه اكيد طبعا
سلمى:خلاص انا هاكلها عشان شعرى يطول وانت تاكلها عشان تعملك عضلات
فارس:ايوه صح
*وفضلوا ياكلوا السلطة*
هدى:شوفتى ياماما سمعوا كلامك بس م غير عصبية
درية:انا اتعصبت يابنتى جوزك هو ال كلاموا زى القطر
زهران*وهو خارج م البلكونة*:شوفت بتقول ايه *وكان هيرجع تانى البلكونة*
رأفت*مسكه ورجعه تانى*:معلش معلش ،ست كبيرة معلش يلا بقى عشان خاطر هدى
زهران*قرب وقال ع مضض*:اسف ياطنط ماكنش قصدى مضغوط شوية ,شوية كتير
درية*بتودى راسها الناحية التانية ومتكلمتش*
هدى:خلاص ياماما بقى اعتذرلك بنفسه هى بس ساعة شيطان وراحت لحالها
درية:ويطلع ضيقه عليا ليه وكمان ماكنش مضغوط يعنى وهو بيتفرج ع الماتش وعمال يزعق وصدعلى دماغى
زهران:ما زعق براحتى ياستى ده بيتى وانا حر
درية*وهى بتشاور*:اهوه شوفتوا الكلام
رأفت*بيحط ايده ع راسه*:معلش ياحجة امسحيها فيا انا
درية*بصتله*:خلاص ماشى المسامح كريم برده
رأفت:احنا هنمشى بقى عشان الوقت ميتأخرش اكتر م كدا* وسلم عليه*:واضح ان حد باصصلنا ف العزومة بتاعتك دى كل مرة يحصل حاجة
زهران *ابتسم*:شكلها كدا
درية:وانا كمان همشى
هدى:ليه ياماما ماتباتى معانا
زهران*اول ماقالت كدا بصلها *
درية:لا ياحبيبتى هروح انام ف بيتى ع سريرى هاخد تاكسى كدا كدا م تحت البيت
رأفت:تحبى اوصلك
درية*بصيت لزهران*:جت م الغريب ولا جتش منك,مش عايزة اتعبك
رأفت*رغم اللى بتعملوا بس كانت صعبانة عليه وحس انها زى والدته برده*:لامفيش تعب ولا حاجة هطلع كاميليا وفارس وهنزل اوصل حضرتك
درية:كتر خيرك يا ابنى
زهران*قرب م ودنه*:قابل بقى
رأفت:عيب عليك مش هتسلك معايا وكمان النوع ده بيحب ام كلثوم هسمعها الشريط كله لحد اما نوصل
زهران*ابتسم*:لا ناصح
رأفت:طيب انا عايز اغير عشان اديك التيشرت
زهران:لا اعتبره بتاعك م النهاردة انا جيبهولك اصلا
رأفت*ابتسم ابتسامة صغيرة*:شكرا
* وخد عيلته وطلعهم البيت وبعديها خد درية وفعلا كانت بتحاول تتكلم معاه*
درية:طب يعنى مفيش حل انها تحمل ابدا
رأفت:هو انتى ضد تنظيم الاسرة ولا ايه ياحجة
درية:بتقول ايه
رأفت*ابتسم وحط ايده ع الكاسيت*:انا حاسس انك بتحبى ام كلثوم
درية:طبعا ف حد مابيحبش الست
رأفت:هسمعك بقى احلى اغنية م اغانيها اسمها الاطلال
درية:يـــالهوى دى طويلة اوى
رأفت*بصوت مش مسموع*:ما هو ده المطلوب
درية:ايه؟
رأفت:قصدى عشان نتمزج طول الطريق اسمعى يا طنط الحلاوه اسمعى
*وفضل يشغلها الاغنية لحد ما وصلوا والحمدلله وصل رأفت بسلام م غير اى حوار وف الوقت ده كان زهران وهدى قاعديين مع بعض*
هدى:ينفع كدا يازهران الحصل مع ماما
زهران:ما انتى عارفة ما بحبش كدا ,ده انا الـ كلامى مش كتير بتوصلنى لعصبية تخلينى اقعد اتكلم عشر ساعات بحالهم
هدى:هى ع فكرة ماكنتش غلطانة دى عايزة مصلحة سلمى وتاكل اكل كويس وصحى
زهران*بتنهيدة*:ماشى بس برده مش بالطريقة دى طريقتها صعبة اوى ياهدى ما انتى شوفتى بنفسك يعنى ،عموما خلاص حصل خير وهحاول ميتكررش ده تانى
هدى:ياريت والله
زهران :خليكى فكرة انى قولت هحــــــــاول
هدى:انا عارفة هو مفيش فايدة
*وفضلوا يتكلموا مع بعض وعديت فترة وف يوم تكون هدى واقفة ف الحمام وايديها بتترعش وكانت ماسكة اختبار حمل ....وللحكاية بقية
هنعرف الحصل الحلقة الجاية
تأليف:فــاطــمــة هــشــام